LIQUIÇÁ, 09 setembru 2024 (TATOLI) – Sarani husi munisípiu Bobonaro hamutuk rihun ida-resin, segunda ne’e to’o ona fatin konsentrasaun área Kaitehu, aldeia Mota-Ikun, suku Mota-Ulun, postu administrativu Bazartete, munisípiu Liquiçá, hodi prepara atu partisipa misa iha Tasi-Tolu, Dili ne’ebé prezide husi Papa Fransisco.
Peregrinu hirak-ne’e la’o komboiu ho karreta kamioneta, bís, anguna, inklui kareta privadu ho totál unidade 600-resin.
Peregrinhu hirak-ne’e to’o fazeadamente ne’ebé tuku 12:50 tama dahuluk iha Kaitehu husi Balibó, tuir kedas Atabae, Maliana, Cailaco no Lolotoe ikus liu iha oras tuku 16:50.
Komboiu ne’e hetan seguransa másimu husi Polísia Nasionál Timor-Leste no akompaña ho ambulánsia husi ekipa servisu saúde munisípiu Bobonaro.
Peregrinu postu administrativu Atabae atuál xefe aldeia Madebau, suku Atabae, Hermenegilado da Cruz, agradese tanba bele to’o fatin konsentrasaun ho di’ak no seguru.
Nia manifesta sentimentu kontente no vontade tomak atu partisipa iha misa apostóliku ne’e.
“Ha’u mai hakarak simu bensaun direita, fiar katak Papa sei lori pas no dame, establidade ba timoroan hotu-hotu iha rai-doben ida-ne’e,” xefe aldeia ne’e informa.
Peregrinu hosi Bobonaro, Floriana Seixas, sente kontente no agradese ba Governu tanba prepara ona kondisaun ne’ebé seguru no hakmatek hodi prepara-aan atu partisipa misa solene ne’e.
“Ha’u hakarak mai partisipa misa tanba Amu Papa mai, ida uluk ha’u la tuir, agora ha’u mai hodi simu bensaun no domin husi Papa Francisco,” nia agradese.
Enkuantu tuir observasaun Jornalista TATOLI iha terrenu nota katak, hafoin tún husi karreta, sarani idak-idak book-aan kedas monta tenda hodi prepara fatin deskansa nian.
Iha fatin konsentrasaun ne’e mós estabelese postu saúde, ne’ebé responsabiliza husi Diresaun Servusu Munisipál Bobonaro no Cruz Vermelha Timor-Leste atu halo atendimentu primeiru sókoru, alende ne’e hetan mós seguransa másimu husi Polísia Nasionál Timor-Leste.
Jornalista: Sérgio da Cruz
Editór: Evaristo Soares Guterres
