DILI, 10 setembru 2024 ( TATOLI) – Ekipa Kruz Vermella Timor-Leste (CVTL, sigla portugés) evakua sarani na’in-rua monu iha Vila-Verde bainhira hein Amu Papa iha ne’ebé enkontru ho Lider Relijiozu sira iha Igreja Imaculada da Conseição Katedral.
”Ami ohin evakua sarani na’in-rua monu iha dalan ninin sira ne’e, tanba sira hamlaha, mai hein Amu Papa, sira la matabisu ka la hemu bee hodi sira monu iha fatin refere”, Xefe Ekipa CVTL Fernando da Costa, subliña ba TATOLI iha Vila-Verde, ohin.
Nia dehan, ekipa CVTL ho Post Saúde rua mak lokaliza iha Vila-Verde, ida iha katedral nian, ida mak iha Prokuradór Jerál nian oin, entaun CVTL evakua ba iha Prokurador Jeral oin.
“Sarani sira dader de’it antuziasmu hodi hein Amu Papa iha Igreja Katedral oin mai to’o Mandarin hodi halo sira kolen, entaun sarani na’in-rua monu ne’e ami lori ba Post Saúde iha Prokuradór Jerál nia oin, nune’e médiku sira fó atendimentu primeiru sokoru no sira di’ak fila fali hodi kontinua hein Amu Papa.
Iha fatin hanesan, Xefe Ekipa médiku iha Post Saúde iha Vila-Verde, Cristina Ximenes, dehan sarani na’in-rua, ohin, mak monu no profisionál saúde halo atendimentu kedas.
”Na’in-rua monu ne’e idade 20 ba leten, feto hotu, sira monu tanba sira sai husi uma la matabisu la hemu bee, entaun sira forsa la iha to’o monu, entaun ekipa CVTL evakua mai ami halo tratamentu to’o di’ak, sira kontinua ba forma iha dalan hodi hein Amu Papa”, Cristina Ximenes haktuir.
Ekipa saúde no ekipa CVTL hamutuk 12 mak hala’o knaar iha Post Saúde iha Prokuradór Jerál oin atu atende sarani sira ne’ebé mak monu.
Tuir observasaun husi Ajénsia TATOLI iha terenu katak bainhira Papasei enkontru holider relijiozu, sarani sira nafatin antuziasmu hodi hein maske rai manas, maibé sira la sente kolen, depois enkontru ho lider sira sarani sira kontente no haskolok hodi hakilar Papa Fransisco no Papa fó hamnsa, haksolok hodi hiit liman, fó bensaun ba sarani sira neebé mak hamrik iha dalan ninin.
Notísia relevante : SNAEM transporta sarani sira monu husi rotunda to’o aimutin hamutuk na’in-haat
Jornalista : Felicidade Ximenes
Editór : Zezito Silva
