DILI, 09 setembru 2024 (TATOLI) – Servisu Nasionál Ambulánsia Emerjénsia Médiku (SNAEM.IP) evakua sarani sira ne’ebé mak oin halai no monu iha rotunda Nicolau Lobato to’o igreja Ai-mutin hamutuk na’in-haat, na’in-rua mak la konsege tula.
“Ohin ha’u rasik mak tun ba tula pasiente, iha rotunda na’in-rua depois iha eskola 30 de Agosto nia oin, na-in-ida, mai fali igreja Ai-mutin na’in-ida no na’in-rua mak ami la konsege tula tanba sarani sira la fó fatin atu kareta atu tama”, Diretor SNAEM.IP Simplicio Amaral de Deus ba TATOLI iha Tasi-Tolu, ohin.
Nia dehan, na’in-rua la konsege tula ne’e madre ida mak dezmaia to’o monu iha Delta inklui ida tan, maibé kareta labele tama ba tula tanba ema barak.
”Husi sarani sira ne’ebé mak monu ne’e ho idade 12 anos, na’in-rua idade 60, inklui inan isin rua na’in-ida’, ‘nia subliña.
Nia relata, sira ne’ebé mak monu ne’e la tama ba kategoria grave, maibé ida-ne’e normál tanba sira mai hein Papa Francisco, dalaruma sira la matabisu, la han no la hemu, entaun ida-ne’e mak halo sira oin halai.
”Ami tula ba sentru saúde Comoro maibé depois médiku sira atende sira di’ak fila fali hodi hein Amu Papa iha dalan”, nia esplika.
Nia hatutan, na’in-tolu mak ekipa ambulánsia lori ba sentru saúde Comoro na’in ida, ekipa sira halo tratamentu iha ambulánsia laran to’o di’ak.
Nia relata, Fatuhada mai to’o Motael, ema monu iha, maibé ekipa seluk mak evakua to’o agora sira seidauk relata dadus mai.
”Ida-ne’e senáriu normál, aban misa, ita sei hasoru senáriu ne’ebé mak mais piór”, nia konklui.
Jornalista : Felicidade Ximenes
Editór : Zezito Silva
