Idoza Juliana de Jesus hein bensaun husi Papa
DILI, 10 setembru 2024 (TATOLI) – Juliana de Jesus, idoza ho idade 78, hein bensaun husi Papa Francisco, iha resintu Igreja Catedral Imaculada Conceição, tanba labele partisipa misa iha Tasi Tolu, Dili.
Idoza ne’e haktuir katak, horiseik nia lakonsege haree no simu amo Papa iha Aeroportu, tanba kestaun saúde oan sira laautoriza atu la’o dook. Hafoin akompaña notísia iha televizaun sira, Papa sei halo sorumutu ho líder relijiozu sira iha Igreja Catedrál, no aproveita ho oan sira ne’ebé bá hotu Tasi Tolu hodi partisipa misa, nia deside ba hein Papa iha 08:00 otl dadeer iha igreja hakarak hetan bensaun.
Iha fatin hanesan, Sérgio Gomes, rezidente iha Vila-Verde, hatete ohin nia kontinua ba hein Papa iha Igreja Catedral, tanba hakarak haree ho besik Santo Padre. “Horiseik la konsege haree Amo Papa nia oin, tanba ema barak, nune’e nia laiha oportunidade atu haree ho matan rasik. Nu’udar sarani katólika ho prezensa Amo Papa ni’an hanesan grasa ida, tanba hafoin liu tiha tinan 35 mak Papa ida bele sama ain iha Timor-Leste”, akresenta.
“Uluk Papa João Paulo II mai vizita ita nia rain, ha’u sei tinan neen , maibé agora ha’u bele haree ho matan rasik. Hafoin haree tiha Amo Papa nia oin, sente haksolok no nu’udar timoroan. Ita agradese tebes maske Amo Papa Francisco ho idade avansadu ona, maibé nia hakarak sama duni ain iha ita nia rai”, nia haktuir.
Notísia relevante: Inan isin-rua entuziasmu hein vizita Papa
Jornalista: Afonso do RosárioDeus
Editora: Isaura Lemos de
