DILI, 10 Setembru 2024 (TATOLI) – Sua Santidade Papa Francisco iha nia vizita pastorál ba Madre Asosiasi Lembaga Misionari Awam (ALMA), iha Pantai Kelapa, hodi hasoru malu ho labarik ho defisiénsia sira.
Iha ámbitu vizita ne’e, labarik sira bá kumprimenta Papa no iha oportunidade ne’e mós Pontífise dada-lia ho joven defisiensia motora, Arcângelo Araújo Nunes, ne’ebé hetan asidente viatura no halo nia tenke tuur iha kadeira roda.
Iha momentu ne’e, Arcângelo Nunes hasoru Santu Padre no Papa ko’alia liafuan balun diretamente ba nia iha lian españól hodi bele enkoraja nia iha moris loroloron no husik hela mensajen eskrita iha nia diáriu “com a minha benção” . No liafuan ne’ebé Papa hateten ba nia “forsa mak importante, labele lakon esperansa”.
“Ha’u labele ko’alia, tanba oportunidade únika halo ha’u hanoin lakon no ibun toos tiha atu ko’alia. Maske ha’u iha preparasaun atu ko’alia ho Amu Papa, maibé Santu Padre husu ha’u nia naran no tinan no diáriu ne’e, ha’u hatán hotu iha portugés”, Arcângelo Nunes informa ba Tatoli.
Joven ne’e espresa nia sentimentu kontente tanba bele hetan oportunidade ne’ebé estraordinária, tanba Papa mai la’ós tinan-tinan no presiza dékada mak iha fali vizita papál. Nia salienta iha tinan 35 liubá mak nia mai no agora mai iha tinan ida ne’e.
“Sente orgullu tebes, bainhira ha’u bá hasoru ita-nia Santu Padre. Ha’u laiha liafuan hodi kulia, entaun ha’u fó ha’u-nia livru ne’ebé durante ne’e ha’u hakerek fó amu atu asina. Ida ne’e ha’u prepara antes ona. Entaun, ha’u bá madre sira no hakarak ka lakohi tenke fó ba Amu Papa asina”, nia espresa ho kontente.
Iha diáriu ne’e Arcângelo hakerek kona-ba asidente ne’ebé nia hetan iha tinan tolu liubá banihira nia iha idade 22, iha Metiaut.
“Iha ha’u-nia diáriu ne’e, ha’u relata kona-ba ha’u-nia kondisaun atuál hanesan ema defisiénsia, tanba akontesimentu iha tinan liubá hetan dezastre no dezafiu sira ne’ebé ha’u hasoru hanesan lakon esperansa no dezanima mak laiha mundansa ba kondisaun fízika no kada vés piór”, nia haktuir.
Nia mós agradese ba Maromak, tanba ohin ho grasa Maromak nian no halo nia forte filafali. “Entaun, ha’u hakerek ha’u-nia diáriu sira ne’e até agora. Bainhira rona Amu Papa mai vizita ALMA ho labarik oan sira, ha’u mos tuir. Konsege hetan oprotunidade husi Madre ALMA sira ne’ebé mai vizita ha’u no fó konvite ba ha’u ohin bele partisipa”.
Foinsa’e ne’e sente gratidaun iha momentu espesiál ne’e, tanba bele hasoru ho Santidade Papa no husik liafaun bensaun ba nia ho Papa nia naran, nomos oferese tersu ida ba nia.
Notísia relevante: Kongregasaun ALMA prepara labarik na’in-tolu tara-tais no oferese ai-funan ba Papa Francisco
Joralista: Jesuína Xavier
Editora: Maria Auxiliadora
