DILI, 10 setembru 2024 (TATOLI)– Papa Francisco hatudu nia oin midar no kontente hodi fo bensa ba labarik nain-tolu ho Grupu Kultural Parokia Imaculada Coração de Maria (PICOMA) Maubisse ne’ebé simu nia vizita ho bidu no dadolin.
Dader ne’e, hafoin Papa remata nia vizita iha Kongresaun ALMA (Asosiasi Lembaga Misinaris Awam) iha Pantai Kelapa iha 09:30 OTL dader, ho ekipa kontinua kedas vizita mai Igreja Maria Imaculada da Conceição Katedral hodi halao enkontru ho konfisaun relijiozu no relijioza sira.
Iha tuku 09:50 OTL, Sua Santidade ho ekipa tama iha resintu igreja nian no simu kedas ho haklalak husi sarani, madre, padre, frater no katekista sira, nune’e mós bidu no dadolin ne’ebé oferese husi labarik nain-tolu no Grupu Kultural PICOMA Maubisse.
Hafoin tun husi kareta, ajudante Papa nian lori kedas Papa ba veranda igreja nian ne’ebé iha ona Arsebispo Dili, Dom Virgílio Kardeal do Carmo da Silva, Nunsiatura Apóstolika, Monseñor Marco Sprizzi, Bispo Dioseze Maliana, Dom Norberto Amaral no Bispo Dioseze Baucau, Leandro Maria Alves.
Notisia relevante : Grupu Kultural PICOMA Maubisse sei simu Papa iha Katedral ho dadolin no bidu
Aliende ne’e iha mós prezensa husi Monseñor Dominikus Saku hanesan Bispo Dioseze Atambua, Monseñor Charles Gauci no Monseñor Eugene Hurley hanesan Bispo reprezentante husi Australia.
Hafoin Papa Francisco hola fatin iha veranda Igreja Katedral nian, labarik nain-tolu ne’ebé nomeadu ona husi komisaun nivel altu nian lao kedas lori biti, luhu rua ho bua malus malus no ahu, ida seluk lori tabaku, batar kulit ho ai tohik hodi fo koñese ba Papa Francisco sentidu loloos kultura Timor-Leste.
Jornalista Tatoli nota, Papa ho kontente hakuak no rein labarik sira nia rentos ho oin midar, hafoin labarik sira fila mai hamutuk ho Grupu Kultural PICOMA nian hatudu bidu no dadolin ho lian mambae.
Maske Papa Francisco la kumpriende liafuan ne’ebé lia nain kolia sai iha lian materna Timor nian ida ne’e, maibe Papa nian oin midar tebes hodi hare’e saida mak aprezenta husi grupu kultural ne’e.
Akompaña ho oin midar, Papa nia matan sempre hare’e ba atributu sira ne’ebé Grupu Kultural PICOMA uza hanesan kesi lensi no tau manu fulun iha ulun, tau keke iha liman, belak no morten tara iha kakorok, tau tais metan ho selendang mutin kesin iha kanotak.
Nune’e mós feto sira hiit sira nia babadok no gong, kesi lensu iha ulun no tau kaebauk, hatais kebaya metan.
Hafoin liu tiha minutu tolu asiste bidu no dadolin ne’e, Papa Francisco hiit liman sae hodi fo bensa ba grupu refere, nune’e mós Grupu Kultural PICOMA hakruuk hodi remata sira nia aprezentasaun.
Jornalista : Cidalia Fátima
Editora : Armandina Moniz
