Grupu Kultural PICOMA Maubisse sei simu Papa iha Katedral ho dadolin no bidu

DILI, 07 setembru 2024 (TATOLI)— Grupu Kultural Parokia Imaculada Coração de Maria (PICOMA) Maubisse preparadu ona hodi simu Papa Francisco iha Igreja Maria Imaculada da Conceição Katedral iha loron 10 setember 2024.

Igreja Maria Imaculada da Conceição Katedral Dili sai mos hanesan destinasaun ida husi sekuensia vizita pastoral Papa Francisco nian mai Timor-Leste hodi enkontru hamutuk ho relijiozu/relijioza sira.

Governu hamutuk ho Igreja mós iha fulan jullu liu ba nomeia ona Grupu Kultural PICOMA ne’ebé eziste ona iha tinan 1989 hodi hola kna’ar ba simu Sua Santidade ho dadolin no bidu atu hatudu sentidu inkulturasaun entre igreja no kultura Timor-Leste.

Sabádu dader ne’e Kultural PICOMA ne’ebé kompostu husi feto 13 no mane 17 husi munisípiu Ainaro no postu administrativu Maubisse akompaña husi Padre Paroku Katedra, Paulus Maya halao kedas treinu ka geladi hamutuk hanesan parte ba preparasaun.

Notisia relevante : Papa Francisco sei hala’o enkontru ho relijiozu 2.000 iha Igreja Katedrál

“Ohin ami mai iha sidade Dili atu halo preparasaun ba seksaun kultural ba sua santidade Amu Papa Francisco ho treinu ka geladi nune’e iha loron 10 dader ami prontu hodi lori serimonia ida ne’e. Tarefa ne’ebé governu no dioseze haruka mak iha pakote tolu kompostu husi serigala, olik no tebe dahur,” Ekipa Koordenador Tekniku ba Kultural PICOMA, Paulo Doutel Sarmento dehan ba jornalista iha Igreja Katedral Dili, sabádu ne’e.

Nia esplika, serigala mak sei halo simu no look (bua malu, tabaku no seluk tan), olik (dadolin) sei husu bensa matak malirin hafoin sei taka ho tebe dahur katak reprezenta povu Timor-Leste husi Tutuala Lautém to’o Lifau Oe-cusse, husi Biqueli Ataúro to’o Betano Manufahi.

“Ne’e hodi sarani no povu tomak nia naran hodi hato’o bemvindu ba Sua Santidade Papa Francisco. Sei hu’u karau dikur hodi hatudu ksolok husi povu Timor nian ba Amo Papa katak bainhira nia mai ho lori saseluk São Pedro mai iha Timor-Leste hodi hatudu maske dook tebes maibe nia saseluk bele hit aan mai too iha rai ida ne’e,” dehan nia.

Igreja Katedral prontu simu Papa Fancisco

Aliende preparasaun boas vindas kultural nian, dader ne’e iha mos prezensa husi Ekipa Delegasaun husi Vatikanu akompaña husi Nunsiatura Apostólika, Monseñor Marco Sprizzi no Arsebispu Metropolitana Dili, Dom Virgílio Kardeal do Carmo da Silva ne’ebé halo mós inspesaun ikus ba faze preparasaun iha Igreja Katedral ne’ebé pronto ona katak buat hotu sufisiente ona.

“Ita iha faze final ona ne’ebé hein deit atu simu Papa nia vizita iha uma kreda ida ne’e, ho ita nia meius no kapasidade sira ita bele dehan preparasaun too ona faze final. Katak ita hein deit ona iha loron 10 setembru mai ne’e. Husi Vatikanu iha parte liur laiha buat ruma ona, iha parte laran mak sira aumenta buat ruma mas ne’e laos buat ida ne’ebé bo’ot,” esplika Padre Parókia Katedral, Paulus Maya.

Husi observasau Agência Tatoli nian iha terenu dader ne’e grupu kategorial eskuteiru, apostoladu, akolitu no THS-THM kontinua halo limpeza jeral iha areador Igreja Katedral, nune’e mós madre husi Kongregasaun Carolus Borromeus kontinua inisia dekorasaun altar igreja nian.

Notisia relavante : Ekipa delegasaun Vatikanu sujere koloka sarani iha fatin mamuk iha Katedrál

Tuir planu iha loron 10 setembru 2024, oras 09:30 dader, Papa Franciso sei halao vizita ba Igreja Katedral hodi fo bensa ba ema moras 100 resin inklui enkontru ho relijiozu/relijioza sira inklui katekista sira kuaze 2,000 ne’ebé hahu tama areador igreja hahu tuku 04:00 dader to’o 07:00 hodi simu Papa Francisco.

Ho vizita ida ne’e Ekipa Konjunta PNTL no F-FDTL mós hasai ona desizaun hodi taka estrada husi diresaun Madre Alma Bebonuk ba to’o Igreja Katedral. 

Jornaslita : Cidalia Fátima

Editora     : Armandina Moniz