DILI, 06 setembru 2024 (TATOLI)—Padre Pároku Igreja Katedral de Dili, Paulos Maria, hateten Papa Francisco ne’ebé vizita pastorál iha Timor-Leste ne’ebé hahú husi 09-11 setembru 2924 ne’e, tuir oráriu sei hala’o enkontru ho relijiozu/a sira iha Timor-Leste iha tersa (10 setembru) iha Igreja Katedrál Dili.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
Nai-lulik ne’e hateten, tuir lista ne’ebé rejista ne’e iha total relijiozu no relijioza hamutuk 2.000 mak sei partisipa enkontru ho Amu Papa Francisco iha Igreja Katedral.
“Enkontru ne’e espesífiku, entre Amu Papa ho relijiozu/a timoroan nian hanesan bispu, padre, madre, irmaun, leigu, seminarista, konsagradu,katekista sira hola parte iha laran. Ne’ebé, tuir lista ne’ebé iha partisipante kuaze ema 2.000 husi dioseze Dili, Baucau no Maliana. Telijiozu no relijioza sira-ne’e mai husi kongresaun hotu ne’ebé eziste iha Timor-Leste,” Nia hateten ba Agência Tatoli programa “Entrevista Eskluziva’’ ho tópiku “Preparasaun simu vizita Amu Papa iha Igreja Katedral”, iha estúdiu Faról, kinta (05 setembru 2024) ne’e.
Nia konsidera, enkontru ne’e entre aman ho oan no enkontru ne’e mós partilla esperíénsia moris relijiozu no relijioza, tanba iha ne’eba kongresaun sira mesak misionáriu de’it.
Iha enkontru ne’e, sei partilla moris ida husi relijiozu no relijioza sira iha misaun ba Amu Papa, iha ne’eba mós bainhira partilla ne’e hotu sei iha reprezentasaun hodi ko’alia reprezenta relijiozu/a sira hotu ba Amu Papa, entaun depois mak ema hotu sei rona fali Amu Papa sei ko’alia.
“Ko’alia kona-ba sasin moris. Ezemplu, se katekista ida, nia ko’alia kona-ba nia envolvimentu iha misaun kristu nian no evanjelizasaun, ninia esperíensia pesoál ho kristu oinsá, nia misaun ne’e saida, nia fó testemuña ba Amu Papa kona-ba nia aan ho misaun evanjelizasaun. Saida mak nia sente, hetan no nia simu husi ninia misaun ida-ne’e, ida-ne’e mak nia sei fahe hodi hato’o ba Amu Papa,” nia hateten.
Nia hateten, ho prezensa Amu Papa nian ne’e atu fó liután motivasaun no esperansa ba relijiozu/a sira atu kontinua nafatin misaun evanjelizasaun kristu nian, katak lori ka hakbesik liafuan di’ak Maromak nian ba ema hotu, akumula no hakuak ema hotu-hotu inklui kiik ka boot no kiak ka riku ba ema hotu-hotu no ba sé de’it.
Tanba, tuir nia, evanjelizasaun nia liafuan di’ak ne’e tenke ba to’o ema hotu, tanba ne’e Amu Papa mai to’o iha ne’e ho ninia prinsípiu ida ne’ebé nia dehan ‘atu sai ba buka ida-ne’ebé lakon”.
“Tanba ne’e, ita Timor-Leste konsidera hanesan rai ida dook tebes husi Europa mai to’o iha ne’e, dalaruma ema dehan dook tebes no dalaruma ema mós lahetan ita. Maibé, Amu Papa nia prezensa ita bele dehan lori mundu mai Timor. Depois, Amu Papa fila, lori Timor ba mundu ona, ne’e ba ita grasa ida,’’ nia hateten.
Iha parte seluk, nia dehan, daudaun ne’e igreja mós prepara ona tradutór timoroan ida nu’udar amu lulik hodi sai tradudór durante iha enkontru ho Amu Papa.
Enkuantu, Igreja parókia Kadetrál halo ona preparasaun másimu atu simu Amu Papa nia vizita ba iha Katedral, hanesan iha preparasaun dahuluk mak finaliza ona reabilitasaun ba Igreja Katedral rasik.
Sekuénsia husi programa vizita, mak bainhira Amu Papa to’o iha varanda Igreja Katedral nian sei iha grupu kulturál ida husi parókia Maubisse ne’ebé sei reprezenta kultura no tradisaun Timor-Leste nian hodi halo dadolin simu Amu Papa.
Depois iha oferesimentu ai-funan husi labarik kiik na’in-rua (2) husi sarani parókia Katedrál entrega ba Amu Papa, hafoin Papa tama ba Igreja laran, kontinua kumprimenta amu lulik, madre no katekista sira, hafoin Papa sa’e ba altar hodi halo enkontru ho relizioju/a sira.
Bainhira ramata enkontru, Amu Papa sai husi parte odamatan sul nian no iha ne’eba sei prepara fatin ba ema ho kondisaun espesiál ho ema moras sira, entaun iha ne’eba Amu Papa sei kumprimenta.
Hafoin ne’e sei fó bensa mós ba plaka obra kontrusaun ne’ebé kada dioseze no instituisaun Governu balun aprezenta.
Notísia Relevante: Governu entrega reabilitasaun Katedrál-rezidénsia madre ALMA ba Igreja
Jornalista : Nelson de Sousa
Editór : Cancio Ximenes
