DILI, 10 setembru 2024 (TATOLI) – Remília do Santos Correia no Ángela dos Santos, nu’udar sarani husi munisípiu Liquiçá, manifesta nia sentimentu ho emosionál katak prezensa Sua Santidade Papa Fransisco mai Timor-Leste hametin liután ninia fiár katóliku nia, tanba Santu Padre líder Katóliku mundiál ida ne’ebé simplisidade, hakraik-an no la halo diskriminasaun ba ema hotu.
Peregrina husi Hu Iso Lara Iso ne’e deside ho sentimentu no vontade tomak partisipa iha misa apostÓliku ne’e, tanba hakarak hetan bensaun husi Santu Padre.
Notísia relevante: Sarani Bobonaro no Liquiçá nadadon tama ba Tasi-Tolu
“Ha’u sente kontente no orgulu tanba hanesan jerasaun foun foin primeira vez hetan Amu Papa Francisco no Amu Papa rasik mós foin primeira vez mai Timor-Leste, amu Papa ema ida di’ak, simples tebes, ninia jestu ida-ne’e mak bele hametin liután ami-nia fiar, no ida-ne’e ita sarani hotu-hotu presiza banati tuir,” peregrina ne’e informa ba Jornalista TATOLI iha Tasi-Tolu, Dili, tersa ne’e.
Sentimentu hanesan ne’e mai mós husi perigrina munisípiu Liquiçá, Ángela dos Santos, tanba selebrasaun misa apostóliku hanesan momentu oportunu ida-ne’ebé la naran akontese iha tinan ida ka rua nia laran.
“Ami hein kleur tebes atu simu Santu Padre, ida-ne’e hanesan grasa boot, liuhusi misa ida-ne’e ami bele simu bensa no domin husi Papa rasik,” nia katak.
Tuir observasaun Agência TATOLI iha terrenu nota katak, durante la’o nadodon ba fatin misa, peregrinu idak-idak lori kedas ho bukae hanesan; biskuit no ai-haan seluk tan hodi kalsu kabun atu bele aguenta to’o misa solene ne’e remata.
Viajen pastorál ne’e Papa Francisco hahú uluk husi Indonézia, Papua Nova-Guiné, Timor-Leste no ikus liu iha Singapura. Bainhira hala’o viajen apostóliku ne’e hosi Singapura hafoin fila ba Itália, Vatikanu.
Notísia relevante: Sarani Bebonuk haksolok simu Papa Francisco no sente espíritu tama iha laran
Jornalista: Sérgio da Cruz
Editór: Evaristo Soares Martins
