DILI, 10 setembru 2024 (TATOLI)—Sarani sira ho entusiazmu forma iha dalan ninin no tasi-ibun Motael-Faról to’o kuaze tama Timor Plaza, iha tersa dadeer ne’e, hodi simu Papa Francisco ne’ebé tuir ajenda atu halo vizita ba kongregasaun Madre Asosiasi Lembaga Misionaris Awam (ALMA) hodi hasoru labarik sira ho defisiénsia husi Eskola ‘Irmãs ALMA.’
“Papa Francisco hanesan Maromak tanba ohin ha’u la hetan Papa Francisco nia oin, maibé ha’u sente nia espíritu tama iha ha’u laran,” Sarani husi Bebunuk, Margarida da Costa, hato’o ba Agência Tatoli, iha Bebonuk, postu administrativu Dom Aleixo, munisípiu Dili, tersa ne’e.
Sarani ne’e hamonu matan-been bainhira simu Papa Francisco iha Kongregasaun Madre iha Bebonuk tanba nia lembra fali Papa João Paulo II mai Timor iha tinan 1989 no mai tan dala-ida.
“Momentu ne’ebá ha’u-nia oan sei kiik no agora boot hotu ona to’o balun iha oan no beioan tan ona, nune’e ha’u sente kontente tebes ho prezensa Papa Francisco mai to’o ami-nia bairru no ALMA. Bainhira ha’u haree Papa tama mai madre ALMA nian, fuan ida-ne’e sente tanis no sente laiha liafuan atu ko’alia. Ita atu kaer nia liman, maibé nia emar (seguransa) barak haleu nune’e ita la konsege,” nia akresenta.
Notísia relevante : Joven Marconi halo limpeza hodi prepara ba vizita Papa Francisco iha ALMA
Nia dehan, maski la kaer Papa Francisco nia liman, maibé hetan bensaun espíritu nian hodi sente espíritu tama iha nia laran
“Ha’u sente bensaun tama no ha’u-nia fuan tanis tanba ida-ne’e milagre hanesan Nossa Senhora Maria Auxiliadora ne’ebé kous Jesus, ida-ne’e milagre ba ha’u,” nia espresa.
Nune’e mós, sarani Agostinho de Jesus Pereira Exposto, konsidera prezensa Amu Papa iha Madre ALMA nian no ia suku Bebunuk bele lori pás no estabilidade.
“Ha’u kontente Papa bele mai iha fatin ida-ne’e tanba fatin ne’e sempre ema serang malu, tanba ne’e ho prezensa Papa Francisco bele lori dame no domin mai ami ida-ne’e, nune’e husu hotu atubele moris iha pás no estabilidade nia laran,” nia katak.
Margarida da Costa iha esperansa, liuhusi Papa nia prezensa bele muda juven sira-nia mentalidade no brutalizmu, nune’e bele sai personalidade inteletuál no bele lori dezenvplvimentu país ba oin.
Jornalista : Osória Marques
Editora : Julia Chatarina
