DILI, 10 setembru 2024 (TATOLI)–Sarani sira ne’ebé sei partisipa misa solene ne’ebé prezide husi Líder másimu Igreja Katólika mundiál, Papa Francisco, iha tersa ne’e, hadau malu sosa masã iha Rotunda Nicolau Lobato Comoro, maski iha loron manas.
“Misa ne’e tuku 16:00, ne’ebé sei iha tempu, entaun fa’an tiha masã. Ha’u fa’an iha dalan ne’e la’ós buka lukru boot maibé hanesan ajuda ita-nia maluk ne’ebé presiza ai-fuan hodi tahan loron manas, ha’u tuir misa maibé sei falta oras balun tan, ne’ebé ha’u aproveita fa’an,” Sarani iha área Rotunda Nicolau Lobato Comoro nian, Egídio Amaral, hato’o ba Agência Tatoli, iha Rotunda.
Notísia relevante : Sarani Baucau partisipa misa solene ho esperansa hetan bensaun husi Papa Francisco
Egídio Amaral dehan, tanba manas presiza aifuan ruma, nune’e bele halo malirin ema ne’ebé la han no sai husi uma ka fatin konsentrasaun iha madrugada.
“Ha’u la’ós mak fa’an sasán barak, maibé ha’u fa’an de’it masã, no ida-ne’e la’ós fa’an karun, ha’u fa’an fuan haat $1. Loloos ne’e nia presu $1,50, maibé ida-ne’e hanesan ajuda malu entre ita ema,” nia tenik.
Nia haktuir, bainhira Papa Francisco liu dalan, nia haree hatudu domin boot.
“Entaun, hanesan sarani ida hakarak kontribui liuhusi aifuan ida-ne’e, karik iha ema balun sosa rua de’it, ha’u oferese de’it. Tanba oferese ne’e hanesan umanu la’ós atu lakon osan,” Egídio Amaral, katak.
Tuir observasaun Jornalista Agência Tatoli iha terrenu, nota katak aleinde Egídio Amaral fa’an masã, fahe mós ba ema lubuk ida. Nia fa’an masã kaixa ida.
Jornalista : Osória Marques
Editora : Julia Chatarina
