DILI, 10 setembru 2024 (TATOLI)–Sarani sira ne’ebé partisipa iha misa solene, ne’ebé prezide husi Papa Francisco, iha Tasi-tolu, preokupa tebes ho kondisaun ekran husi parte tasi nian, ne’ebé sira haree la moos tamba ai-sanak taka ekran.
“Loloos Komisaun Organizadora ne’e tenke haree fatin mak tau ekran, agora iha ne’e ai-hun naruk loos, entaun ita labele asesu serimónia misa liuhusi ekran ne’e,” Sarani Francisca Maia informa ba Agência Tatoli, iha Tasi-tolu, tersa ne’e.
Nia mós preokupa, ekran ne’e laiha lian, nune’e sarani sira labele rona misa tanba Altar dook.
“Ami la sente tuir misa. Osan tau barak, aprova barak maibé ita la rona buat ida. Presiza tau atensaun iha futuru,” nia rekomenda.
Notísi relevante : Peregrinu rejistradu provizóriu 164.777 sei partisipa misa solene iha Tasi-Tolu
Papa Francisco tama fatin selebrasaun misa solene, iha tuku 16:00 liu no hahú misa iha kuaze tuku 17:00.
Tuir dadus ikus husi Igreja, sarani hamutuk kuaze 200.000 rejistradu partisipa iha misa ne’e, maibé seidauk inklui ho sarani sira ne’ebé la rejistradu maibé hakarak partisipa inklui peregrinu sira husi Indonézia.
Maski misa hahú daudaun, maibé sarani sira kontinua la’o ain hodi partisipa misa.
Jornalista : Osória Marques
Editora : Julia Chatarina
