DILI, 03 setembru 2024 (TATOLI)–Sekretáriu Estadu Komunikasaun Sosiál (SECOMS), Expedito Dias Ximenes, hateten dadus provizoriu peregrinu sira husi 12 inklui Rejiaun Adminisrtativu Espesiál Oé-Cusse Ambeno (RAEOA) ho total hamutuk 164.777 atu partisipa misa solene ne’ebé Papa prezide iha Tasi-Tolu.
“Husi totál ne’e, sarani sira husi Lautém hamutuk 5.503, Baucau 13.702, Viqueque 10.530, Manufahi 3.850, Aileu 7.500, Bobonaro 7.805, Ermera 14.330, Manatuto 7.841, Liquiça 12.400, Ainaro 9302, Covalima 4.356, Dili 67.994, Ataóro 1.300 no RAEOA hamutuk 2.344,” Governante hateten liuhusi konferénsia imprensa iha Motael, Dili,
Husi totál númeru husi munisipiu sira hotu ne’e, munisípiu Dili mak rejista númeru maiór sarani sira ba partisipa misa solene iha Tasi-Tolu.
Husi, totál dadus provizóriu sarani sira-nian autoridade munisipál aprezenta iha enkontru la inklui mós ho peregrinu sira husi rai-li’ur hanesan Kupang-Indonézia (NTT).
“Ohin, Primeiru-Ministru Kay Rala Xanana Gusmão ho Prezidente Autoridade Munisipál sira hotu husi munisipi 12 ho Autoridade Ataúro no RAEOA. Iha enkontru ne’e atu hatene preparasaun sira oinsa organiza sarani sira no ema hira atu mai tuir misa iha Tasi-Tolu,” Sekretáriu Estadu Komunikasaun Sosiál (SEKOMS), Expedito Dias Ximenes, hateten ba jornalista sira liuhusi konferénsia imprensa iha Motael.
Governante ne’e mós hateten iha enkontru mós hodi haree kona-ba mobilizasaun sarani sira-nian ho transporte atu mai Dili.
“Balun aprezenta aranja karreta rasik no balun dehan transporte la to’o no Primeiru-Ministru orienta komisaun hodi aranja ba sira,” nia dehan.
Hafoin enkontru hotu Primieru-Ministru, Prizidente Autoridade Munisiál (PAM) ba Tasi-Tolu hodi haree fatin ba misa no fatin konsentarasaun sira iha Hera, Kasnafar no Tibar.
“Vise-Ministru Administrasaun Estatál ho ekipa ohin ba haree no sei hato’o relatóriu no Primieru-Ministru mós ba haree hodi hadi’a buat balun ne’ebé seidauk,” nia hateten.
Ró Ramelau no Succes transporta sarani sira husi RAEOA no Ataúro
Aleinde ne’e, Sekretáriu Estadu Komunikasaun Sosiál, Expedito Dias Ximenes, hateten ró Berlin Ramelau sei transporte sarani husi Rejiaun Administrativu Espesiál Oé-Cusse Ambeno (RAEOA) da-haat no róo Succes sei transporte da-rua sarani sira husi Ataúro.
Nia relata peregrinu sira liu 2.000 mak mai husi RAEOA no peregrinu sira hamutuk 1.300 mak husi Ataúru.
“Ataúro sei mai ho ró Succes no Oé-Cusse sei mai ho ró Ramelau, tanba sira liu 2.000, ro Ramelau sei tula sira da-haat no Ataúro,” nia dehan.
Relasiona ho vizita Amu Papa nian, Prezidente APORTIL, José Oliveira Leong, hateten APORTIL informa ona ba públiku kona-ba movimentasaun pasajeiru entre Rejiaun Administrasaun Epesiál Oé-Cusse (RAEOA)-Dili sei iha mudansa ba oráriu operasaun Ró ahi Berlin Nakroma relasiona ho vizita sua Santidade Papa Francisco mai Timor-Leste.
Nia hateten, sarani sira husi parokia Oé-Cusse hamutuk 2.344 ne’e sei aluga ró ahi Berlin hodi partisipa misa solene ne’ebé prezide husi Amu Papa iha Tasi-Tolu iha loron 10 Setembru tuku 16h30.
Tanba ne’e mak APORTIL hakarak informa ba pasajeiru sira kona-ba mudansa ba oráriu ida-ne’e hodi públiku bele hatene no hetan informasaun.
Jornalista : Jesuína Xavier
Editór : Cancio Ximenes
