DILI, 10 Setembru 2024 (TATOLI) – Madre Superiora Asosiasi Lembaga Misionari Awam (ALMA), Getrudis Bidi, hateten vizita Santidade Papa Francisco bá iha ALMA reforsa espíritu pastorál no misaun iha Timor-Leste (TL).
“Iha sentimentu agradese, agradese no agradese ba Maromak nia laran di’ak no hadomi labarik sira ne’ebé iha nesesidade espesiál”, madre superiora hato’o ba Tatoli, iha Pantai Kelapa, ohin.
Getrudis Bidi garante katak ho vizita Papa nian reforsa espíritu misaun pastorál hodi kuidadu Maromak nia emar sira ne’ebé iha nesesidade espesiál hanesan ema ki’ak, ema ho defisiénsia, autizmu, abandonadu no kuran fiar.
“Bá oin ita hakarak ALMA bele to’o iha dioseze Baucau no Maliana no iha fatin sira seluk atu ita bele serbí Maromak nia povu”, madre espera.
Iha fatin hanesan, Madre Marta dos Santos mós espresa nia sentimentu kontente no agradese ba Maromak. “Ha’u sente kontente no agradese liu. Laiha liafuan ne’ebé bele espresa, maibé sente de’it mak hasoru momentu sira hanesan ne’e. Oinsá Maromak bele hamutuk ho ita. Ida ne’e estraordinária ba ami, liuliu mak ba ami oan sira”.
Nia salienta katak maske Kongregasaun ALMA fatin ida ne’ebé ki’ik, simples no labraik sira mós simples, maibé Papa bele vizita sira.
“Liuhusi momentu ida ne’e, fó esperansa, kbiit no forsa ba ami atu bele sente kontente nafatin. Labele hela ho teoria ne’ebé aprende, maibé prátika mak barak iha moris loroloron nian, liuliu tau-matan ba ema sira ne’ebé presiza tebes, ba maluk ki’ak, kuran ba domin no fiar”, dehan.
Iha vizita pastorál Papa Francisco iha Madre ALMA, labarik sira simu ho tara tais no fó ai-funan no hananu múzika.
Notísia relevante: Mensajen Papa ba joven defisiénsia: “Forsa mak importante, labele lakon esperansa”
Joralista: Jesuína Xavier
Editora: Maria Auxiliadora
