DILI, 11 setembru 2024 (TATOLI)- “Boa viajen papa Fransisco! Boa Viajen Papa Francisco” sarani sira iha Sentru Konvensaun Dili (CCD) hato’o.
Mensajen boa viajen ne’e, sarani sira – feto no mane, ho otas oioin, hato’o ho entuziasmu no apresiasaun boot, bainhira Sua Santidade Papa Francisco konklui nia sorumutu ho foinsa’e sira, iha resintu CCD nian.
Tuir observasaun TATOLI, iha portaun oin no resintu CCD nian, sarani sira mout iha ambiente euforia ksolok nian, hodi hato’o lian-maka’as ho sentidu. “Boa viajen Papa Francisco! Boa Viajen Papa Francisco”!
Hakilar no hakilar nafatin husi sarani sira. “Boa viajen! La’o di’ak to’o Singapura. Maromak akompaña!”
Sarani sira-nia lian “semo” iha arredór CCD nian. Papa Francisco hatudu oin-midar iha sarani no seguransa sira-nia leet.
Iha dalan-ninin, maske movimentasaun sarani sira-nia barak maibé nafatin tuir regra protokolu nian. Iha dalan-ninini, husi CCD too rotunda Nicolau Lobato, sarani sira komprimenta amu papa tanba atu husik rai Timor-Leste. Tuir ajenda, Papa Francisco sei kontinua viajen Apostólika bai ha Singapura.
Jornalista : Felicidade Ximenes
Editór: Rafael Ximenes de A. Belo
