DILI, 11 Setembru 2024 (TATOLI) – Iha loron 10 Setembru sarani rihun ba rihun konsentra hotu iha areadór Tasi-Tolu hodi partisipa misa solene ne’ebé dirije husi Papa Francisco, iha tuku 16h30 to’o tuku 19h00.
Sarani sira ne’e tama iha esplanada Tasi-Tolu hahú husi dadeer to’o misa remata mak fila bá idaidak nia uma. Liuhusi konsentrasaun ida ne’e, tuir observasaun jornalista Tatoli, ohin dadeer, sarani sira husik hela lixu barak ne’ebé lekar iha fatin ne’e.
Fo’er sira ne’e maioria mak aqua mamuk, plástiku, rebusadu kulit, tisu, inklui kaixa mamuk, no labarik sira mak rekolla hela iha áreadór Tasi-Tolu.
Agustinha de Jesus Amaral nu’udar rezidente iha Tasi-Tolu sente triste tanba komunidade balun seidauk iha konxiénsia soe lixu iha fatin ne’ebé komisaun prepara ona.
“Amu Papa mai ita-nia rai ne’e kontente tanba lori domin no pás mai Timor-Leste, maibé horsehik sarani sira balun ko’alia la rona, soe arbiru de’it [lixu] hanesan ne’e. Tuir loloos fo’er ne’e tau hamutuk iha nia fatin atu fila bá uma mak soe. Agora, husik de’it hanesan ne’e, entaun pasiénsia, ita ko’alia ba malu mós hanesan de’it”, nia lamenta.
Notísia relevante: Amu Papa sei la haluha joven timoroan nia hamnasa
Maske nune’e, Agustinha Amaral rekoñese katak tanba situasaun horsehik nian akumula sarani barak hahú husi dadersán to’o kalan. “Maibé espera, husi parte komisaun organizadora, orsida lorokraik, aban, bele hamoos ona fatin ne’e, tanba ita haree lixu sei nakonu, ita haree labarik sira hili daudaun fo’er sira-ne’ebé sei di’ak atu uza”, nia hateten.
Notísia relevante: “Boa viajen Papa Francisco!” – Sarani sira iha CCD hato’o
Jornalista Tatoli kontinua mós halo observasaun iha dalan públiku Tasi-Tolu nian no daudaun ne’e sei nakonu ho lixu iha estrada sorin-sorin no forsa seguransa husi F-FDTL sei kontinua observa hela.
Jornalista: Abílio Elo Nini
Editora: Maria Auxilidora
