DILI, 11 Setembru 2024 (TATOLI) – Grupu peregrinu 500 husi Rejiaun Administrativa Espesiál Ooé-Cusse Ambeno (RAEOA) sei fila bá Oé-Cusse, loraik ne’e, ho ró Berlin Ramelau hafoin partisipa misa iha Tasi-Tolu.
Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, hateten dezlokasaun sarani Oé-Cusse ne’e ho fazeadamentu bazeia ba kaléndariu ne’ebé iha katak balun fila uluk no grupu seluk sei tuir tan.
“Ohin loraik, primeru grupu fila uluk ona, ema na’in-500, sira-ne’ebé mai iha loron 04 Setembru 2024 ne’e”, Rogério Lobato dehan hafoin misa iha Tasi-Tolu.
Prezidente komisaun ne’e agradese ba sarani parókia lima iha rejiaun Oé-Cusse, tanba liuhusi kooperasaun no koordenasaun mak fó susesu durante peregrinasaun to’o Dili.
“Parabéns ba imi hotu, buat susesu boot ne’e la’ós komisaun organizadora de’it, maibé ita hotu, ema idak-idak iha ne’e, dezde boot to’o ki’ik, ferik to’o katuas, sira-ne’e hotu hamutuk mak ita halo peregrinasaun mai to’o iha Dili sai susesu”, nia orgullu.
Autuál Prezidente Autoridade RAEOA ne’e husu deskulpa durante estadia iha fatin akantonamentu liuliu ba atendimentu karik ladún di’ak.
“Ha’u husu deskulpa hanesan Prezidente Autoridade, ha’u hatene iha loron dahuluk no daruak, hahán ladún di’ak, maibé ita korrije kedan buat ne’ebé la’o laloos, ita halo loos kedan, ne’e esforsu ita hotu halo hamutuk”, hateten.
Notísia relevante: Sarani husi Oé-Cusse hakat ona bá Tasi-Tolu
Lembra katak, iha loron 03 setembru 2024 ne’e, peregrinu husi Oé-Cusse halo viajen dahuluk mai kapitál ho fazeadamente hodi fahe ba ekipa lima, hahú husi loron 03 to’o 07 Setembru.
FOTO ATUÁL: Fila husi Tasi-tolu, sarani sira entuziasmu nafatin akompaña Sua Santidade
Dadus peregrinu husi Oé-Cusse ne’ebé partisipa iha Tasi-Tolu hamutuk 2.344, komposta husi funsionáriu Governu na’in-473, husi parókia Numbei 806, Padiae 316, Oésilo 210, kuaze parókia Pássabe 167 no parókia Baoknana na’in-270.
Jornalista: Abílio Elo Nini
Editora: Maria Auxiliadora
