DILI, 10 Setembru 2024 (TATOLI) – Sarani 2.344 husi Rejiaun Administrativa Espesiál Oé-Cusse Ambeno (RAEOA) hakat daudaun ona bá Tasi-Tolu hodi partisipa misa solene ne’ebé sei prezide husi Papa Francisco iha tuku 16h30.
Prezidente Konsellu Pastorál Sentru Parókia Numbei, João Evaristo Bobo, hateten tuir ajenda peregrinu Oé-Cusse sei tama iha meiudia, maibé tanba fatin maka komisaun deside hodi tama iha tuku 9h00 dadersán ne’e.
Notísia relevante: Fraternidade umana nakonu ho valór relijiozu hodi hametin pás
“Ita-nia orariu fó husi komisaun katak ita tama jam 12 to’o jam 13:00, maibé agora ita prepara atu tama antes iha jam 10 hanesan ne’e, tanba ema barak komesa tama, depois haree mós ita-nia fatin atu ema labele ema oukupa”, João Evaristo Bobo ba Tatoli, ohin.
Nia informa katak fatin ba sarani Oé-Cusse atu partisipa iha misa ne’e konsentra iha fatin tolu, ida mak kataliña númeru 16 kataliña númeru 12 no iha kataliña númeru 19 iha parte terminal nian.
“Sira balun daudaun la’o tama ona, maibé agora ita-nian kataliña 16 ne’e, iha parte estrada boot ninin, iha parte São João Paulo II nia, odamatan Amu Papa atu tama tuir ba ne’e. Oé-Cusse nian bele tama hamutuk, maibé kada parókia iha fatin ketak-ketak”, nia informa.
Notísia relevante: Konfisaun relijiozu prenxe ona Igreja Katedral husi tuku 04:00 dadeer
João Evaristo Bobo hateten komisaun la autoriza sarani sira uza transporte, tanba daudaun ne’e situsaun iha dalan públiku hahú engarrafamentu.
“Oé-Cusse nian besik hela, la persiza lalin ho transport. Husi Pelican Paradise bá ne’e han tempu minutu 20 hanesan ne’e. Ne’ebé la persiza uza transporte tanba ema barak mak la’o ain hodi oukupa estrada sira,” nia dehan.
Sarani Imaculada Caunan dehan bá sedu di’akliu atu haree fatin no lori kedan ho hahán no bee atu bele konsumu iha meiudia hodi hein Papa Fransisco prezide misa
“Ami mai dadersán ne’e lori kedan bee no hahán atu to’o meudia bele han netik buat ruma. Kona-ba loron manas ne’e la sai problema, importante mak tuir misa ne’e de’it”, nia hateten.
Tuir observasaun joranalista, daudaun Tasi-Toli nakonu ona ho peregrinu sira hodi hein misa iha loraik.
Notísia relevante: Sarani Becora hahú preparasaun ba tuir misa iha Tasi Tolu
Jornalista: Abílio Elo Nini
Editora: Maria Auxiliadora
