DILI, 10 setembru 2024 (TATOLI)– Konfisaun relijiozu no relijioza konsentra ona iha Igreja Maria Imaculada da Conceição Katedral hahu kedas husi tuku 04:00 OTL dadeer hodi hein Papa Francisco nia prezensa.
Tuir orariu vizita pastoral Papa Francisco nian, enkontru ho konfisaun relijiozu no relijoza sira hanesan bispo, padre, madre, frater, katekista no ema moras sira monu iha loron 10 setembru 2024, husi tuku 09:30 to’o 10:30 OTL.
Observasaun ne’ebé Jornalista Tatoli halao iha terenu, hahu kedas husi tuku 04:00 OTL dadeer partisipante ba enkontru ne’e hahu konsentra ona iha Igreja Katedral hodi hein prezensa Papa Francisco nian.
Igreja Katedral hetan seguransa maximu husi Forsa Tarefa Konjunta F-FDTL no PNTL, inklui Eskuteriu no Ekipa Voluntariu Igreja nian, nune’e mós akolitu sira halo formatura kedas iha estrada sorin-sorin portaun oin.
Husi portaun laran bele hare’e sarani balun komesa hein ona prezensa Papa Francisco nian no seluk kontinua lao ain ba Tasitolu.
Notisia relevante : Labarik nain tolu reprezenta dioseze tolu simu Papa Francisco iha Katedral
Portaun ba asesu nian loke deit iha liman los parte karuk husi igreja, partisipante sira tenke halo formatura liña rua hodi lao ba portaun.
Iha portaun oin, ekipa protokolu halo screening ba dala rua molok tama formatura no hafoin atu hakat liu portaun. Iha dalan tama ba areador igreja nia oin, protokolu sei husu pergunta mai partisipa hanesan saida nune’e bele koloka ba fatin hamriik.
Frater sira sei hola fatin iha jardin oin igreja besik ba portaun parte karuk, madre sira hola fatin iha jardin igreja besik ba portaun parte loos nian. Husi igreja oin parte karuk instala ona ekran ida, no iha igreja oin parte karuk nian sei priense husi irmã sira inklui palku ho eskada tolu ba jornalista sira.
Nune’e mós estrada iha igreja nia parte loos prepara mos tenda ho kadeira sira ho formatura liña rua iha ninin sorin-sorin, tuir planu Papa Francisco sei sai husi parte ne’e hodi fo bensa ba ema moras sira kuaze 100 resin.
Husi estrada iha igreja oin parte karuk nian priense ona formatura husi labarik nain-tolu ho Grupu Kultural Parokia Imaculada Coração de Maria (PICOMA) Maubisse hodi simu Papa Francisco ho bidu no dadolin ho sentidu kultura orijen simu bainaka nian iha Timor-Leste.
Labarik nain tolu nia prezensa hodi reprezenta dioseze tolu iha Timor-Leste hanesan hosi Dili, Baucau no Maliana mak, Agusto Caldas Lobato ho idade tinan ualu (8) husi Liquiça, Venissa Maria de Sousa ho tinan ha’at (4) husi Dili no Felicia das Dores de Brito Lopes ho tinan hitu (7) husi Viqueque.
Husi labarik nain tolu ne’e mane ida sei hiit biti ho sentidu nahe ba bainaka hodi tur, iha feto rua seluk, ida sei lori luhu ho bua, malus no ahu, ida seluk sei lori tabaku, batar kulit ho ai tohik ne’ebé tuir tradisaun timoroan nian oferese ba bainaka bainhira vizita.
Fila ba iha parte igreja laran fahe ba parte ha’at diferente mak Bispo sira sei hola fatin iha oin hamutuk ho konvidadu relijiozu no relijoza estranjeiru sira, iha parte klaran sei priense husi Amo Pároku husi kada Parókia, iha parte kotuk karuk no loos sei priense husi reprezente katekista kada parokia nian, inklui superior padre no madre husi kada kongregasaun iha Timor laran tomak.
Enkontru ho konviksaun relijiozu no relijioza sira kuaze 2.000 ne’e sei halao hafoin Papa Francisco remata nia vizita ba Kongresaun ALMA (Asosiasi Lembaga Misinaris Awam) iha Pantai Kelapa.
Remata iha Igreja Katedral iha tuku 10:30, Papa Francisco sei fila hikas ba Nunsitura Apostólika hodi halao enkontru ho Padre Jesuita sira tanbá Sua Santidade mós mai husi kongregasaun hanesan.
Tuir planu Papa Francisco sei prizide misa eukaristia santa iha Tasi-tolu iha tuku 16:30/ 04:30 OTL, ne’ebé sei hetan prezensa husi sarani no peregrinu sira no konvidadu sira.
Jornalista : Cidalia Fátima
Editora : Armandina Moniz
