Labarik nain tolu reprezenta dioseze tolu simu Papa Francisco iha Katedral
DILI, 07 setembru 2024 (TATOLI)– Servisu Seksaun Kultura husi Ekipa Servisu Uma Kreda hili ona labarik nain-tolu hodi reprezenta dioseze tolu Dili, Baucau no Maliana simu Papa Francisco iha Igreja Maria Imaculada da Conceição Katedral Dili.
Koordenador Servisu Seksaun Kultura husi Ekipa Servisu Uma Kreda, António D. J. Maria Gomes hateten iha loron 10 setemberu 2024, iha sekuensia vizita pastoral Papa Francisco nian mai Timor-Leste sei halo mos enkontru hamutuk ho relijiozu/relijioza sira.
“Nune’e ekipa koordenador mak hili rasik no sira reprezenta dioseze tolu no labarik nain tolu mai husi Liquiça, Dili no Viqueque. No, sira ne’e preparadu ona,” Koordenador Servisu Seksaun Kultura husi Ekipa Servisu Uma Kreda iha Igreja Katedral, sábadu ne’e.
Labarik nain tolu ne’e mak hanesan :
- Agusto Caldas Lobato ho idade tinan ualu (8) husi Liquiça
- Venissa Maria de Sousa ho idade tinan ha’at (4) husi Dili
- Felicia das Dores de Brito Lopes husi Viqueque
Nia hateten, labarik nain-tolu ne’e treinu hamutuk ona ho Grupu Kultural Parokia Imaculada Coração de Maria (PICOMA) Maubisse hodi simu papa Francisco liu-liu hatudu sentidu kultura orijen simu bainaka nian iha Timor-Leste.
“Sira nain tolu ne’e mane ida no feto rua. Mane ne’e lori biti hanesan nahe tuir kultura, feto ida lori mama fatin (luhu) iha bua malus ba lok, ida seluk lori mama satin (luhu) tabaku, batar kulit ho ai tohik.
Biti ne’e hodi tane katak ita serve ema ne’ebé dook, biti iha oin tolu mak ida bolu dehan biti kulu nahe uluk, depois biti renda hodi tau (iha leten) no biti renda seluk hodi tane mama fatin ne’e,” Nia dehan.
Agusto Caldas Lobato ho idade tinan ualu (8) husi Liquiça ne’ebé agora dadauk halao nia estudu iha esternatu klase tolu siklu dahuluk nian, sente kontente bele hetan direta Papa Francisco.
“Hau nia tinan ualu agora kelas tiga, sente kontente los bele haree Amu Papa. Ami treinu maibé la sente kolen,” Agusto hatan ba Tatoli.
Tuir planu iha loron 10 setembru 2024, oras 09:30 dader, Papa Franciso sei halao vizita ba Igreja Katedral hodi fo bensa ba ema moras 100 resin inklui enkontru ho relijiozu/relijioza sira inklui katekista sira kuaze 2,000 ne’ebé hahu tama areador igreja hahu tuku 04:00 dader to’o 07:00 hodi simu Papa Francisco.
Ho vizita ida ne’e Ekipa Konjunta PNTL no F-FDTL mós hasai ona desizaun hodi taka estrada husi diresaun Madre Alma Bebonuk ba to’o Igreja Katedral.
Jornaslita : Cidalia Fátima
Editora : Armandina Moniz
