Komisaun B husu mellora liután implementasaun regra protokolu Estadu

DILI, 12 setembru 2024 (TATOLI)—Deputadu membru komisaun B ne’ebé trata asuntu Negósiu Estranjeiru no Defeza ho Seguransa iha Parlamentu Nasionál (PN), Natalino dos Santos, husu liña ministeriál sira atu iha loron aban ne’e mellora liután eventu boot sira hodi implementa regra protokolu Estadu tuir espíritu lei protokolu Estadu ne’ebé órgaun lejislativa ne’e aprova no daudaun vigór hela.
Notísia Relevante: PN aprova projetu-lei Presidénsia no Protokolu Estadu iha finál global
Nia apresia, Governu no Igreja organiza simu vizita Sua Santidade Papa Francisco ho susesu no povu hotu sente orgullu.
Sua Santidade nia vizita Estadu mai Timor-Leste no vizita mai nasaun ne’e hanesan líder másimu Igreja nian ne’ebé mai tanba sarani sira.
“Haree entermu protokolu Estadu, simu vizita Amu Papa ita komesa di’ak uitoan ona, hafoin ita iha lei protokolu Estadu rasik ne’ebé PN rasik aprova no agora vigór hela. Maibé, presiza halo artikulasaun no koordenasaun inter-ministeriál ne’ebé iha kompeténsia hala’o ka jere protokolu Estadu ne’e,” nia hateten ba jornalista sira iha resintu PN, kinta ne’e.
Nia dehan, ezemplu protokolu Estadu ne’e xefia husi Ministériu Negósiu Estranjeiru (MNEK) no implementasaun ne’e Ministériu Administrasaun Estatál (MAE) tuir espíritu lei ne’ebé iha.
“Agora, iha eventu liu ba ne’e eventu Estadu organiza husi Governu, pontu devista haree di’ak no eventu ida Papa mai ne’e sarani nu’udar saseluk São Pedro nian ne’e hala’o vizita pastorál, agora ida-ne’e mak ita haree presiza atu hadi’a entermu artikulasaun entre Estadu ho Igreja Katólika, maibé entermu jerál haree di’ak uitoan,” nia dehan.
Iha komisaun B nia observasaun iha lamentasaun balun komisaun presiza atu haree oinsá atu sensibiliza ba instituisaun atu komprende didi’ak liuliu formasaun ba protokolu sira atu hatene ezerse sira-nia funsaun ho didi’ak.
“Ezemplu, ha’u haree iha eventu ne’e falta koordenasaun artikulasaun, maibé ein-jerál kapaas no susesu, no oinsá ba futuru atu ida halo mellora di’ak liután hodi la’o tuir regra protokolu Estadu,” nia sujere.
Protokolu Estadu ne’e MNEK mak ka’er no implementa hosi MAE, agora haree ba eventu ne’e iha komisaun organizadora loloos sira tenke uniformiza artikulasaun entre sira depois ida-idak haree nia serbisu.
Membru órgaun lejislativu ne’e apresia komisaun ne’ebé organiza eventu ne’e ho lei protokolu Estadu ne’ebé vigór hela iha eventu simu vizita Amu Papa di’ak tebes.
“Foin lalais protokolu iha Palásiu Prezidensiál kapaas tebes. Ita ba haree kompozisaun estrutura tuir saida mak espíritu lei nian, ezemplu, órgaun soberanu, eis titulár, konsellu veteranu, prezidente bankada Parlamentár, prezidente komisaun iha PN, deputadu, membru Governu, komesa di’ak ona, agora ita hala’o di’ak liután,” nia hateten.
Jornalista : Nelson de Sousa
Editór : Cancio Ximenes

