SINGAPURA, 12 setembru 2024 (TATOLI) – Ohin, Papa Francisco hasoru malu ho Prezidente Repúblika, Tharman Shanmugaratnam no Primeiru Ministru, Lawrence Wong hafoin serimónia bemvinda ofisiál iha Parlamentu Nastionál Singapura nian.
Enkontru entre Amu Papa ho líder polítiku Singapura na’in rua, alende ko’alia kona-ba hametin relasaun bilaterál sira ko’alia kona-ba asuntu globál hanesan imigrasaun, mudansa klimátika, dezigualdade rikeza no seluk tan.
Santu Padre agradese ba Prezidente Tharman, Primeiru Ministru no autoridade sira ba sira-nia felisitasaum.
Amu Papa dehan Singapura nu’udar nasaun sentru ba komérsiu iha rejiaun no sai fatin ba enkontru entre ema husi nasaun oioin.
“Ba vizitante sira-ne’ebé foin mak mai fatin ne’e, sei hakfodak no lahaluha ho uma andár moderna sidade ne’e nian. Dinamizmu sidade Singapura sai testemuña ba matenek ema nian,” Papa Francisco hateten bainhira enkontru ho Autoridade Singapura, kinta ne’e.
Santu Padre dehan Singapura la’ós de’it nasaun prósperu, maibé mos buka atu harii sosiedade ida-ne’ebé asegura justisa sosiál no interese komún.
Hafoin enkontru ho lider nasionál rua ne’e, Santu Padre hakat kedas bá Sentru Kultural Universidade Nasionál Singapura hodi hala’o enkontru ho autoridade, sosiedade sivíl no korpu diplomátika sira.
Tuir ajenda, hafoin enkontru referida, Papa Francisco mos sei hala’o mos enkontru privadu ida ho Eis Primeiru Ministru Singapura antes prezide Misa Solene iha tuku 17.15 lokraik iha Estádiu Nasionál Singapura.
Notísia relevante: Aero Dili aterra ona Papa Francisco iha Singapura ho susesu
Jornalista: Filomeno Martins
Editor: Evaristo Soares Martins
