DILI, 13 setembru 2024 (TATOLI)–Ministériu Planeamentu Investimentu no Estratéjiku (MPIE) hamutuk ho estrutura Fundu Dezenvolvimentu Kapitál Umanu (FDCH, sigla portugés), sesta ne’e, despede bolseiru 92 ne’ebé atu kontinua estudu iha nível lisensiatura, mestradu no doutoramentu iha Indonézia, Malázia, Tailándia, Brazíl no Portugal.
“FDCH fó bolsa estudu ba dosente na’in-24 atu hala’o estudu iha universidade privadu. Sira-ne’e prioridade ba Portugal no Brazíl. Depois estudante hamutuk 16 ba área saúde iha anestesia, ne’ebé kontinua estudu iha PolTeKes Jogja. Depois na’in-10 ba área turizmu, nível mestradu nian iha Tailándia. Ida-ne’e ita prepara ba Politékniku Turizmu nian iha Lautém, nune’e ita komesa prepara rekursu umanu,” Diretór Ezekutivu FDCH, Júlio Aparício, hateten, hafoin halo despedida ho bolseiru, iha Delta Nova, Comoro.
Bolseiru sira ne’ebé hala’o estudu iha área enjeñaria, petróleu nomós siénsia komputasaun no seguransa komputadór, no kontabilidade iha Malázia, iha nível mestradu.
“Ba iha Brazíl no Portugal ne’e mesak dosente foti estudu iha área direitu. Kona-ba deslokasaun depende ba anu letivu iha Indonézia, Malázia, Tailándia, Portugal no Brazíl. Agora bá Indonézia ne’e tuir loloos ba tiha tanba ita prepra tiha sira-nia vistu, maibé fulan ne’e nia rohan hahú desloka, Malázia sei aranka iha inísiu outubru, Brazíl ba inísiu ou novembru nia rohan. Agora bá Portugal sei fulan ne’e nia rohan se lae inísiu outubru,” nia akresenta.
Notísia relevante : Governu loke ona vaga bolsa estudu ba jurista 70 iha Portugal
Kustu iha kada nasaun no universidade inklui matéria didátika, imprime, no propina la hanesan, maibé Estadu mak sei akumula hotu despeza ne’e.
“Ida-ne’e bolsa méritu, katak buat hotu Estadu mak responsabiliza. Pur ezemplu, ba Malázia ita fó osan $500, Portugal $1.000, Brazíl $750, Tailándia $600 kada fulan. Agora kona-ba propina depende ba kada universidade,” nia esplika.
Prosesu rekrutamentu desde fulan-marsu liubá, ne’ebé programa ne’e sai ona IX Governu Konstituisionál nia prioridade, ne’ebé tau importánsia ba área saúde, enjeñaria, direitu, turizmu no edukasaun.
Diretór Ezekutivu FDCH husu bolseiru sira hotu atu utiliza no jere osan Estadu ho di’ak.
“Bolseiru mak futuru nasaun, tanba osan Estadu nian, entaun utiliza ho di’ak nune’e aban bainrua bainhira fila mai bele serví fali povu no rai ida-ne’e,” nia fó hanoin.
Iha biban hanesan, Ministru Planeamentu Investimentu no Estratéjiku, Gastão Francisco de Sousa, reprezenta Governu orgullu no husu bolseiru sira atu uza oportunidade ne’e ho di’ak.
“Ita-boot sira-ne’ebé hala’o estudu iha li’ur ne’e importante tebes ba ita-nia nasaun no povu. Dahuluk reprezenta Governu orgullu ho ita-boot sira, ho grasa no dedikasaun sira hotu. Bom estudu no susesu imi hotu,” nia tenik.
Bolseira Indonézia, Jurema Macaria Pinto Mau, konsidera bolsa estudu ne’e hanesan oportunidade osan-mean no folin tebes.
“Oportunidade ida-ne’e sai osan mean hodi loke odamatan ba joven timoroan ne’ebé hakarak atinje iha futuru mak liuhusi área saúde, espesiál ba enfermajen anestezia. Entaun oportunidade ida-ne’e folin tebes mai ami no hanesan billete ida hodi esplora, nune’e koñese mundu ne’ebé laiha limite,” nia katak.
Serimónia despedida ne’e partisipa husi membru Governu hanesan Ministru Ensinu Superiór Siénsia no Kultura José Honório da Costa Pereira Jerónimo, Ministru Justisa Sérgio Hornai, Reprezenta Ministériu Finansa, Sekretáriu Estadu Komunikasaun Sosiál Expedito Dias, no seluk tan, inklui bolseiru sira-nia família.
Jornalista : Osória Marques
Editora : Julia Chatarina
