DILI, 16 setembru 2024 (TATOLI)—Deputada bankada CNRT, Cedelízia Faria dos Santos, lori bankada hato’o apresiasaun ba serbisu Governu Konstitusionál da-sia (IX) ne’ebé la’o iha tinan ida-nia laran.
Notísia Relevante: Governu Konstitusionál da-sia kompleta tinan ida ukun hodi halo reflesaun
“Dahuluk, ajustamentu instituisaun ezistente tuir Planu Estratéjiku Dezenvolvimentu Nasionál (PED) no dixiplina iha ezekusaun orsamentu tuir programa. Atinjimentu lubun ida-ne’ebé Governu alkansa ona iha área oioin mak hanesan, dezenvolvimentu infraestrutura, prosesu desentralizasaun administrasaun hodi hakbesik liután atendimentu públiku ba povu, hadi’a jestaun irrigasaun no agrikultura, turismu no seluk-seluk tán ne’ebé ita hotu bele haree no akompaña,” Nia hato’o liuhusi deklarasaun polítika iha ámbitu abertura sesaun solene lejislativa daruak iha uma fukun PN, segunda ne’e.
Daruak, nia dehan, PN rejista relasionamentu relasaun diplomátika Timor-Leste ho nasaun sira seluk, hatudu progresu ne’ebé di’ak tanba iha aumentu ba estabelesimentu embaixada iha Timor-Leste, ne’e konkista konfiansa mundu internasionál ba Timor-Leste.
Seluk mak adesaun ba tratados internasionál Timor-Leste aprova proposta rezolusaun kona-ba Organizasaun Mundiál Komérsiu (OMK) no rezolusaun kona-ba subsídiu peska, no partisipasaun Sekretáriu Jerál Nasaun Unida (ONU), António Guterres iha selebrasaun tinan 25 konsulta populár iha 30 agostu 2024.
“Vizita Sua Santidade Papa Francisco ne’ebé mundu tomak apresia ita-nia populasaun nia maturidade no entúziasmu, no manifesta kristianizmu Katóliku ne’ebé forte tebes,” nia dehan.
Aleinde ne’e, selebrasaun loron INTERFET ne’ebé sai programa rútina husi Governu liuhosi Ministériu Negósiu Estranjeiru no Kooperasaun (MNEK).
“Bankada CNRT hakarak partilla ami-nia apresiasaun ba progresu sira-ne’ebé Governu atinje ona, no kontinua enkoraja Governo hatudu nia prestasaun iha área seluk hanesan setór saúde, edukasaun no sosiál ne’ebé mak di’ak liután iha tempu oin mai,” nia dehan.
Entretantu Deputadu FRETILIN, Aniceto Longuihos Guterres Lopes, preokupa problema ho sistema edukasaun hanesan menus profesór iha eskola sira no setór saúde falta ai-moruk iha fasilidade saúde atu atende povu, nune’e Governu presiza tau atensaun.
“Ita-nia sistema edukasaun ne’ebé hasoru problema boot, no sistema saúde ne’ebé gravemente falla atu oferese serbisu saude ho kualidade ba sidadaun sira,” nia hateten.
Deputada PLP, Maria Angelina Sarmento, mós preokupa ohin loron povu sei hasoru dezáfiu oioin iha kualidade edukasaun ne’ebé tún, falta ai-moruk iha fasilidade saúde nune’e ezije atu tau atensaun.
Jornalista : Nelson de Sousa
Editór : Cancio Ximenes
