CAFE iha prosesu atu halo espansaun ba munisípiu Ainaro
DILI, 16 setembru 2024 (TATOLI)—Administrasaun Centro de Aprendizagem e Formação Escolar (CAFE) daudaun ne’e iha prosesu atu halo espansaun no harii instalasaun ida iha postu administrativu Maubisse, munisípiu Ainaro.
“CAFE iha prosesu atu halo espansaun no harii tiha ona iha postu administrativu Maubisse, munisípiu Ainaro no iha prosesu katak tinan oin mai ita sei habelar tan projetu CAFE ne’e ba postu administrativu sira seluk,” Ministra Edukasaun, Dulce de Jesus Soares, informa liuhusi nota ne’ebé Agência Tatoli asesu, segunda ne’e.
Ministra nota, mensajen husi Papa Francisco mai Ministériu Edukasaun (ME) husu atu serbisu maka’as, liu-liu haklaken dokumentu fraternidade umana ne’ebé mak ME atu inklui ona iha disiplina ida iha siklu 3 ensinu báziku nian.
“Xave ida atu hetan edukasaun ne’ebé mak kualidade mak tenke iha profesór ida ne’ebé mak kualidade. Tanba ne’e mak la’ós ona tempu atu hatama ema ruma mai hanorin, maibé tenke mantein kritéria ida hodi taes liuhusi teste ida di’ak hodi bele hetan timoroan sira ne’ebé di’ak hodi bele sai forsa traballu husi Ministériu Edukasaun,” nia akresenta.
Notísia relevante : Profesór 150 husi Portugál hanorin iha eskola CAFE
Maski iha kurríkulu, infraestrutura no materiál didátiku di’ak, maibé laiha profesór ida mak ho kualidade di’ak no paixaun atu hanorin nafatin de’it.
“Tanba ne’e mak esforsu ida husi Ministériu Edukasaun halo iha tinan ne’e no tinan oin fiar katak situasaun profesór normaliza ona no tama ona iha momentu ida halo loloos prosesu sira ne’e hotu hodi bele atinje edukasaun ho kualidade,” governante ne’e katak.
Projetu CAFE daudaun ne’e iha ona munisípiu tolu no projetu ida-ne’e hanesan ezemplu di’ak ida husi kooperasaun entre Nasaun Timor-Leste no Portugal.
“Projetu ne’e importante tebes ba deklarasaun lian portugés, projetu ne’e importante tebes ba sira-nia kultura, haree labarik no foin-sa’e sira iha ne’e ho abilidade atu komunika, relasaun entre povu rua ne’e no sira-nia kultura ne’ebé estraordináriu tebes. Ba ha’u, iha momentu ne’e emosionál tebes, momentu ida-ne’ebé vibrante tebes no agradese ba profesora no profesór timoroan no portugés hotu inklui traballadór eskola hotu iha projetu ida-ne’e,” Ministru Estadu Negósiu Estranjeiru Portugal, Paulo Rangel, dehan.
Jornalista : Osória Marques
Editora : Julia Chatarina
