Eskola EBF Fatuhada laiha espasu akumula livru
DILI, 16 setembru 2024 (TATOLI)—Eskola Ensinu Báziku Filiál (EBF) siklu 1,2 Fatuhada daudaun ne’e laiha espasu atu akumula livru iha biblioteka tanba edifísiu iha hela faze konstrusaun.
“Biblioteka ne’e naton iha duni maibé tanba halo konstrusaun foun ba eskola, entaun livru sira-ne’e ami tau hamutuk de’it ba sala profesór tanba fatin mak laiha duni,” Koordenadór Eskola EBF siklu 1,2 Fatuhada, Zacarias de Conceição, informa iha ninia knaar fatin, Fatuhada, segunda ne’e.
Livru sira daudaun rai hela iha sala profesór sira, maibé profesór sira la autoriza estudante sira asesu livru tanba fatin kloot.
“Ne’ebé livru sira-ne’e profesór sira mak mai foti lori ba hanorin depois lori fali mai tau iha fatin de’it. Ita hein konstrusaun foun ne’e ramata mak ita haree katak iha sala balun ne’ebé karik mamuk, ita sei halo ba biblioteka nune’e estudante sira bele asesu livru sira ho di’ak,” nia akresenta.
Notísia relevante : Superintendente Edukasaun Dili identifika eskola balun ladún tau atensaun ba biblioteka
Superintende Servisu Edukasaun Munisípiu Dili, Cesarina Guterres, informa, durante halo monitorizasaun iha eskola, sira identifika eskola balun ladún tau atensaun ba biblioteka nune’e estudante sira la asesu ba livru sira ne’ebé Ministériu Edukasaun (ME) oferese.
“Ami halo monitorizasaun no ami identifika problema iha eskola balun ladún tau atensaun másimu ba biblioteka iha eskola, entaun estudante sira la asesu ba livru sira-ne’e,” nia akresenta.
ME koloka livru ba eskola sira-ne’e atu estudante sira bele lee no kompreende di’ak liután no buka referénsia seluk aleinde husi aprendizajen sira iha aula laran.
“Tanba ne’e, husu ba dirijente eskola sira tenke tau-matan ba bibleoteka ne’ebé mak iha eskola, nune’e estudante sira bele aproveita oportunidade hodi asesu ba biblioteka hodi aumenta sira-nia koñesimentu iha área oin-oin,” nia rekomenda.
Cesarina Guterres dehan, karik bele halo oráriu ba estudante sira kada turma hodi asesu ba biblioteka no bele fó empresta kuandu sira presiza.
“Depois fó tempu limite ba sira atu lori ba uma hodi lee no lori fila mai hatama fali tuir lista ne’ebé iha,” nia katak.
Totál estudante iha Eskola EBF Fatuhada hamutuk 1.242 ho nia profesór 30 inklui ho koordenadór.
Jornalista : Osória Marques
Editora : Julia Chatarina
