DILI, 15 agostu 2024 (TATOLI)—Ekipa husi Servisu Edukasaun munisípiu Dili bainhira halo monitorizasaun, identifika katak eskola balun ladún tau atensaun ba distribuisaun livru husi biblioteka.
“Ami halo monitorizasaun no identifika problema iha eskola balun ladún tau atensaun másimu ba biblioteka iha eskola, tanba livru iha biblioteka laran barak maibé estudante sira la uza no la asesu. Livru ne’ebé Ministériu Edukasaun (ME) koloka ba sira ne’e tenke uza no funsiona iha biblioteka nune’e estudante sira bele lee no kompreende di’ak liután no buka referénsia seluk aleinde husi aprendizajen sira iha aula laran,” Superintendente Servisu Edukasaun munisípiu Dili, Cesarina Guterres, informa iha ninia knaar fatin, Comoro, kinta ne’e.
Tanba ne’e, Superintendente ne’e husu ba dirijente eskola sira atu tau matan ba biblioteka ne’ebé mak iha eskola, nune’e estudante sira bele aproveita oportunidade hodi asesu ba biblioteka hodi aumenta sira-nia koñesimentu iha área oin-oin.
“Se bele dirijente sira halo oráriu ba estudante sira kada turma hodi asesu ba biblioteka, nune’e mós bele fó empresta ba sira kuandu sira presiza hanesan referénsia ruma depois fó tempu limite ba sira atu lori ba uma hodi lee no lori fila mai hatama fali tuir lista ne’ebé iha,” nia akresenta.
Notísia relevante : Sentru Imprensaun Comoro hahú imprime livru ba ensinu sekundáriu
Durante ekipa halo inspesaun, identifika eskola sira ne’ebé ladún tau atensaun ba biblioteka mak hanesan Ensinu Sekundáriu Jerál (ESJ) 05 de Maio Becora, ESJ 4 de Setembru, ESJ Fitun Naroman Timor-Lorosa’e (FINANTIL), ESJ 12 de Novembro no Ensinu Báziku Filiál (EBF) Naroman.
Hatán ba kestaun ne’e, Diretór ESJ FINANTIL, Aniceto Barlelo, hateten, la’ós dirijente sira mak la tau atensaun ba biblioteka ne’ebé iha eskola hodi estudante la asesu ba livru ne’ebé oferese husi ME, maibé ema ida atu halo jestaun ba biblioteka ne’e mak laiha.
“Ita labele fó livru ba estudante sira arbiru, tanba dalaruma sira lori bá uma mak lakon tiha ita la hatene no sé mak atu responsável, entaun ami halo ona pedidu ba ME atubele fasilita ami ho rekursu umanu nune’e bele halo jestaun ba livru sira-ne’e no oinsá halo planu fé empresta livru ba estudante, tanba ami profesór sira iha ne’e hotu-hotu okupadu ho hanorin, entaun ami labele halo jestaun ba ida-ne’e,” nia dehan.
Eskola ESJ FINANTIL daudaun ne’e iha estudante hamutuk 1.700 ho saladeaula 18, no profesór hamutuk 67.
Jornalista : Osória Marques
Editora : Julia Chatarina
