DILI, 16 setembru 2024 (TATOLI)–Koordenador Eskola Ensinu Báziku Filiál (EBF) siklu 1,2 Fatuhada, Zacarias de Conceição, hateten, konstrusaun eskola daudaun ne’e atinje ona 60%.
“Iha andar okos ne’e taka hotu ona no hein kompleta tan ida leten nomós uma ida seluk hein kompleta tan nia parede sira, garante katak sei termina iha tinan ne’e, espera janeiru tinan oin bele entrega ba ita nune’e bele utiliza ba prosesu aprendizajen,” Koordenadór eskola informa iha ninia knaar fatin, Fatuhada, segunda ne’e.
Notísia relevante : Eskola EBF Fatuhada laiha espasu akumula livru
Konstrusaun foin atinje 60% tanba antes ne’e serbisu la’o tarde tanba bainhira Ajénsia Dezenvolvimentu Nasionál (AND) haree, laiha prezensa husi ME.
“Nune’e mós hanesan Ministériu Edukasaun mai tiha Ajénsia Dezenvolvimentu Nasionál la mai. Entre prosesu kontrusaun ne’e lori tinan-rua. Uma ne’e iha mudansa ona tanba nia ai-rin harii hotu ona, hein kompleta nia parede, reboka, nahe no taka nia kakuluk sira. Uma rua ne’e iha saladeaula hamutuk 12, uma ida ho saladeuala neen, okos tolu no leten tolu mós, no iha mós haris fatin ketak-ketak,” nia akresenta.
Nia dehan, saladeaula ne’e sufisiente ona hodi bele akumula estudante husi 10 to’o 60 ano. Antes ne’e saladeaula la to’o maibé ho konstrusaun foun ne’e bele ona.
“Ita sei fahe turnu rua, dadeer ho lorokraik tanba iha estudante hamutuk 1.242. Ida-ne’e sufisiente ona ba ami,” nia tenik.
Empreza Betuhei Unipesoal Lda toma konta ba konstrusaun Eskola EBF Fatuhada, hahú iha loron 12 outubru 2023 to’o 2024 mak kuaze tinan-rua ona, no ikus mai prolonga dala-rua ona. Orsamentu ba obra ne’e hamutuk $727.422,58.
Jornalista : Osória Marques
Editora : Julia Chatarina
