DILI, 17 setembru 2024 (TATOLI)–Tékniku Ajénsia Nasionál (ADN), Francisco Xavier, informa ekipa lojístika sei sobu fila-fali toilet públiku iha esplanada Tasi-Tolu nian, toilet públiku ne’ebé monta ne’eba ne’e temporária ba eventu misa solene ne’ebé Papa Francisco prezide iha segunda (10 setembru 2024) iha tuku 16h30 lorokraik.
Notísia Relevante: Empreza Karya Timor konstrui toilet públiku 7 iha Tasi-Tolu
Nia hateten, toilet públiku iha Tasi-Tolu hamutuk hitu (7) ne’ebé iha unidade 70 ne’e sei sobu fila-fali, tanba bele fó impaktu ba iha ambiente.
“Haris fatin ba serimónia foin lalais ne’e ita halo ba provizóriu hotu, entaun bele fó impaktu ba ambiente. Nia konstrusaun ne’e semi permenen,” Tékniku Ajénsia Nasionál (ADN), Francisco Xavier, hateten ba Tatoli, tersa ne’e.
Nia esplika, toilet públiku ne’e nia didin taka de’it ho tripelex no zinku provizoriamente atu sarani sira bele uza iha eventu ne’ebá, tanba ne’e mak sei sobu fila-fali.
“Ita sei hasai fila-fali posu toilet públiku nian hodi soe ba Tibar no sobu didin sira-ne’e mós sei sobu hotu, ita lakohi husik hela,” nia dehan.
Tékniku ne’e esplika, toilet públiku iha altar nia kotuk no hamutuk ho uma sakristia nian ne’e mak konstrui permanente, atu atividade ka eventu ruma realiza iha fatin ne’e karik bele uza fila-fali.
“Ida seluk permanente ne’e sira responsável ba espasu públiku (Autoridade Munisipál). Altar nian ne’e permanente ona, ita la sobu atu fasilita atividade altar nian no ba ema-ne’ebé atu vizita ba iha fatin ne’e,” nia hateten.
Francisco Xavier mensiona iha haris fatin hamutuk 10 iha sakristia nian lima ba mane no lima ba feto ne’ebé permanente iha espalanada Tasi-Tolu nian.
Jornalista : Jesuína Xavier
Editór : Cancio Ximenes
