DILI, 17 setembru 2024 (TATOLI)—Ministériu Finansa (MF), iha semana kotuk, transfere ona osan konsensaun eskolár ba eskola sira ho nível Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV) nia konta bankária.
“Tanba ne’e, husu ba dirijente sira atubele ba foti ona osan ne’ebé iha hodi ezekuta tuir manuál konsensaun eskolár, signifika uza osan ne’e labele ses husi manuál, husu atu labele gasta hotu maibé uza tuir planu ba kompra. Dirijente sira tenke iha transparánsia ho profesór sira hotu, katak osan ne’e foti tau iha oin hodi ema hotu haree no uza ba nesesidade eskola,” Diretór Nasionál Ensinu Sekundáriu Jerál iha Ministériu Edukasaun (ME), Benjamin Fernandes, hateten iha ninia knaar fatin, Vila-Verde, tersa ne’e
Osan konsensaun eskolár iha tinan ne’e tama tarde ba konta bankária kada eskola tanba iha mudansa balun.
“Tinan ida-ne’e nia prosesu naruk oituan, tanba tinan-tinan ba kotuk ne’e osan konsensaun tama ba Servisu Edukasaun munisipál ninia konta bankária hafoin eskola sira utiliza, maibé tinan ne’e ba oin osan tama direta ba konta bankária kada eskola. Ita dehan prosesu ne’e naruk tanba primeiru ami sei loke sira-nia konta bankária, segundu ami sei hein kode vendór husi Finansa sentrál, depois Ministériu Finansa haruka ami tenke verifika didi’ak lai tan lista sira ne’e atu evita osan ne’e tama ba konta bankária seluk,” nia akresenta.
Notísia relevante : Servisu Edukasaun Manatuto husu ME no MF aselera pagamentu konsensaun eskolár
MF transfere osan hamutuk $727.232 ba ESJ no ESTV sira iha territóriu tomak, kompostu husi munisípiu Baucau $92.016 ba Eskola ESJ hamutuk sia hanesan ESJ nú. 01 Baucau, ESJ nú. 01 Laga, ESJ Quilic Uagae, ESJ Dom Carlos F.X Belo Afaça, ESJ nú. 01 Quelicai, ESJ Sentrál 02 Baucau, ESJ nú. 2 Vemasse, ESJ Venilale no ESJ Baguia.
Munisípiu Manatuto hetan transferénsia $20.064 ba eskola tolu hanesan ESJ Sentrál Kay Rala, ESJ Sentrál KW Laleia, no ESJ Convertida Nicolau Lobato Soibada. Munisípiu Lautém $51.952 ba eskola haat hanesan ESJ Sentrál Conis, ESJ nú. 01 Lautém, ESJ Lere Anan Timur Kuluhun, ESJ Luro. Munisípiu Viqueque $61.760,00 ba eskola lima hanesan ESJ Sentrál, ESJ Sentrál Calixa, ESJ Olocassa Ossu, ESJ Sabika Besi Kulit inklui ho ESJ Daraloi Iraler no ESJ Sentrál Watucarbau.
Munisípiu Ataúro $ 9.648,00 ba eskola ida hanesan ESJ Sentrál Ataúro. Munisípiu Dili $165. 984 ba eskola hitu hanesan ESJ 04 setembru, ESJ 12 novembru, ESJ 05 maiu, ESJ FINANTIL, ESJ 20 setembru Metinaro, ESJ 10 dezembru no ESJ Convertida Hera.
Munisípiu Liquiçá $47.457 ba eskola tolu hanesan ESJ Sentrál Liquiçá, ESJ Filial Maubara, ESJ Filial Bogoro. Munisípiu Aileu $ 35.104 ba eskola tolu hanesan ESJ Aileu Malere, ESJ Lequidoe no ESJ Laulara.
Munisípiu Bobonaru $53.665 ba eskola tolu hanesan ESJ Dom Martinho, ESJ Convertida Lacalori Cailaco, ESJ Convertida Cavalaria nú. 3 Bobonaro. Munisípiu Ermera $69.248 ba eskola haat hanesan ESJ Nino Conis Santana Gleno, ESJ Cesar Maulaca, ESJ Sentrál Maucruma, ESJ Convertida Raicala.
Munisípiu Ainaro $30.000 ba eskola rua, ESJ Sentrál Fernando de A. Lasama no ESJ Convertida Hato-Udo. Munisípiu Covalima $45.952 ba eskola tolu hanesan ESJ Seran Cotek Suai, ESJ Reconvetida Fohorem, ESJ Reconvetida Zumalai. Munisípiu Manufahi $42.400 ba eskola tolu hanesan ESJ 1912 Same Holarua, ESJ Reconvetida Betano, ESJ Reconvetida Francisco Borja Fatuberlio.
Jornalista : Osória Marques
Editora : Julia Chatarina
