OÉ-CUSSE, 17 Setembru 2024 (TATOLI) – Organizasaun Internasionál Naun-Governamentál (ONG) World Neighbors (WN) selebra, ohin, akordu kooperasaun téknika ho Ministériu Agrikultura Pekuária, Peska no Floresta (MAFFP) hodi haforsa Projetu Redusaun Risku Klimátiku iha Timor-Leste no Indonézia (CRITICAL), ne’ebé sei implementa iha munisipíu Bobonaro no Rejiaun Administrativa Espesiál Oé-Cusse Ambeno (RAEOA).
Jestór Programa WN, Cornélio Ase, informa katak objetivu husi Projetu CRITICAL atu hadi’ak estratejia ba redusaun risku klímatiku atu aumenta produtividade agríkola, protesaun kontra peste no moras no reziliénsia peska lokál.
“Projetu ne’e sei implementa iha RAEOA no Bobonaro, sei fó benefísiu ba abitante rihun 24, tanba projetu ida-ne’e sei haree liu ba komunidade vulneravel sira-ne’ebé hela iha área rurál, tanba ho alterasaun klímatika ne’ebé iha, sempre fó ameasa maka’as. Komunidade laiha kbiit atu responde ba dezastre ne’ebé sira hasoru, entaun liuhusi kooperasaun ne’e ita sei haforsa liután serbisu iha baze”, Cornélio Ase dehan iha ámbitu selebrasaun akordu ne’e, iha edifisíu WN Oé-Cusse, ohin.
Notísia relevante: EUA-TL lansa projetu CRITICAL atu hasa’e reziliénsia komunidade ba mudansa klimátika
Responsavel ne’e fó-sai katak iha akordu ofisiál ne’e, define programa prioridade tolu, ne’ebé korresponde direita ba setór agrikultura no ekonomia atu hadi’a povu nia moris.
“Atividade prinsipál iha setór tolu ne’ebé ita sei implementa, primeiru mak agrikultura atu hasa’e komunidade sira-nia produtividade iha área agroflorestál, konservasaun agrikultura no promosaun ai-han lokál. Ita sei integra ho aplikasaun mudansa klímatika, promove ba agrikultór sira. Nune’e bele apoia sira atu hatene katak bainhira peste ataka ai-han, sira bele prepara aan”, nia dehan.
Daruak mak jestaun rekursu naturál, foku liu ba konserva no proteje bee-matan sira atu apoia atividade agríkola. Datoluk mak setór ekonómiku, atu hadi’a komunidade sira-nia moris no asesu ba finanseiru, entaun atividade prinsipál mak sei estabelese grupu rai no empresta osan no promove atividade moris nian, ne’ebé foku liu oinsá utiliza produsaun ai-han lokál sira-ne’ebé kuda iha baze.
“Husi setór tolu ida-ne’e, prioridade ida-ne’ebé ami sei promove liu mak ai-han lokál, ida mak shorgum. Sei promove iha munisipíu rua ne’e, tanba planta ne’e nia bele adapta di’ak iha área ne’ebé rai-maran”, katak.
Notísia relevante: Projetu CRITICAL benifísia ema rihun 24 iha Oe-Cuse no Bobonaro
Iha fatin hanesan, Diretora-Jerál MAPPF, Ervina Soares Pinto, espera katak liuhusi akordu ne’e, bele garante nia implementasaun atu fó mudansa ba moris ba agrikultór sira durante iha períodu implementasaun projetu.
“Asina memorandu ne’e atu serbisu hamutuk ho WN atu apoia serbisu ne’ebé WN sei implementa iha Oé-Cusse no Bobonaro. Ha’u-nia esperansa katak projetu ne’e sei la’o di’ak tanba la’ós foin primeira-véz WN hala’o atividade ne’e, maibé antes asina akordu ami vizita ona fatin iha terrenu hodi haree serbisu WN nian, ne’ebé halo ona iha Oé-Cusse. Ami haree iha susesu”, nia relata.
Notísia relevante: EUA no Timor-Leste kontinua implementa Programa F2F hodi promove agronegósiu no nutrisaun
Rekorde katak projetu Redusaun Risku Klimátiku ne’e hetan finansiamentu másimu husi Ajénsia Estadu Unidu ba Dezenvolvimentu Internasionál (USAID, sigla inglés) hamutuk millaun $6.6, hodi implementa iha Indonézia no Timor-Leste ho durasaun tinan haat, hahú husi marsu 2024 to’o marsu 2028.
Jornalista: Abílio Elo Nini
Editora: Maria Auxiliadora
