DILI, 18 setembru 2024 (TATOLI)—Embaixada Repúblika Indonézia (KBRI) liuhusi Sentru Kulturál Indonézia (PBI, sigla Indonézia) prepara kuota ba universidade hamutuk 60 husi Indonézia hodi partisipa iha espozisaun edukasaun tinan 2024.
Adidu Edukasaun no Kultura KBRI, Ikhfan Haris, hateten, kuota ne’ebé prepara ba universidade iha tinan ne’e boot liu kompara ho tinan kotuk.
“Bainhira ami loke rejistu, maizumenus universidade 90 mak rejistu ona, maibé tanba ami-nia kapasidade la permite, ami hili fali, la’ós sira hotu ne’ebé rejistu ona ami bele fó fatin, ami limita ida-ne’e ba másimu 60 tanba iha tinan kotuk ida-ne’e hamutuk 36 ho vizitante 5.000-resin,” Ikhfan Haris informa ba Agência Tatoli, iha ninia knaar fatin, KBRI, Palapaço, kuarta ne’e.
Notísia relevante : Governu loke ona vaga bolsa estudu ba jurista 70 iha Portugal
Espozisaun ne’e sei hala’o iha PBI husi loron 24 to’o 26 outubru, liuhusi aprezenta rejistu no teste iha fatin nomós oferese bolsa estudu liuhusi edukasaun baze no konsulta estudu sira seluk tan.
Iha loron-tolu atu fó oportunidade ba estudante sira husi sidade sira seluk atu iha tempu sufisiente hodi halo viajen, atende atividade oin-oin hanesan espozisaun edukasaun, enkontru entre universidade Indonézia no enkontru parseria no atividade seluk tan. Aleinde ne’e, fó oportunidade hanesan ba estudante sira ne’ebé sei gradua husi Eskola Téknika Profisionál iha tinan ida-ne’e.
“Iha eskola hotu hateten labarik sira iha klase 12 sei mai iha espozisaun edukasaun iha ne’e hafoin rejista ba selesaun hodi hatudu de’it katak sira halo ona ezame. Pur ezemplu, se ita foti de’it ita-nia diploma iha fulan-dezembru, ita labele rejista, maibé labarik sira-ne’e bele hein atu nune’e sira bele halo fotokopia ba sira-nia kartaun relatóriu ba trimestre 1-7. Tanba ne’e, ami halo fásil ba labarik sira ne’ebé graduadu iha tinan ida-ne’e atubele kontinua sira-nia estudu iha tinan oin,” nia akresenta.
Hafoin ramata tiha, estudante sira ne’ebé laiha abilidade di’ak ba lian Indonézia bele tuir kursu Bahasa Indonesia bagi Penutur Asing (BIPA) ne’ebé fornese husi PBI ho gratuita.
Adidu Edukasaun indonéziu ne’e dehan, universidade sira husi Indonézia antes ne’e rekomenda ona atu hala’o espozisaun edukasaun iha munisípiu sira seluk, maibé labele realiza tanba infraestrutura no edifísiu sira-ne’e la sufisiente atu akompaña reprezentante universidade sira.
Nune’e, PBI hala’o espozisaun edukasaun rua konsege realiza iha Oé-cusse no Dili, iha tinan 2023, hodi aprezenta universidade besik 40 husi universidade 4.523 iha Indonézia.
Bazeia ba dadus husi PBI, iha 17 setembru tinan 2024, númeru estudante Timor-Leste sira ne’ebé simu bolsa estudu atu kontinua estudu iha Indonezia hamutuk na’in-513 liuhusi programa bolsa estudu oin-oin hanesan bolsa estudu ba Kemitraan Negara Berkembang (KNB), Darmasiswa, Parseria ho Ministeriu Finansa Timor-Leste no bolsa estudu jerál sira.
“Iha bolsa estudu jerál 410 iha fulan-setembru inklui sira balun ne’ebé desloka ona bá,” Ikhfan Haris tenik.
Jornalista : Osória Marques
Editora : Julia Chatarina
