DILI, 18 setembru 2024 (TATOLI)—Ministériu Edukasaun (ME) simu ona karta husi Diretór Eskola Katólika sira kona-ba pedidu Igreja Katólika atu profesór admitidu iha vaga bolsa kandidatu tenke mantein iha eskola ne’ebé sira hanorin.
“Sim, ne’e ami hatene ona, Padre, Madre no Diretór Eskola Katólika sira haruka ona karta mai Ministériu Edukasaun. Ami sei haree númeru bolsa kandidatu ne’e hotu kedas, depois Ministériu Edukasaun sei responde ba situasaun sira-ne’e. Nune’e la prejudika Eskola Katólika sira,” Ministra Edukasaun, Dulce de Jesus Soares, hateten iha Vila-Verde, kuarta ne’e.
Governante ne’e rekoñese, Igreja Katólika desde uluk to’o agora sai entidade importante bainhira ko’alia kona-ba asuntu edukasaun.
“Tanba ne’e, ha’u hateten dala-ida tan katak Ministériu Edukasaun loke bolsa kandidatu bazeia ba kuadru pesoál iha eskola públika. Ha’u hanoin hela no ami halo diskusaun ho Amu balun karik iha futuru Ministériu Edukasaun hamutuk ho Komisaun Nasionál Edukasaun Katólika Timor-Leste (CONETIL, sigla portugés) bele loke kuadru pesoál iha Eskola Katólika sira, atu nune’e ita bele hatene katak Eskola Katólika presiza profesór hira. Ida-ne’e Governu nia responsabilidade,” nia akresenta.
Notísia relevante : ME koordena ho dirijente eskolár kona-ba kolokasaun profesór faze daruak
Iha sorin seluk, Prezidente Konferénsia Episkopál Timorense (CET, sigla portugés) no Bispu Dioseze Maliana, Dom Norberto Amaral, husu ba ME atu labele muda profesór kontratadu ne’ebé pasa iha vaga bolsa kandidatu ba fatin seluk.
“Husik nia nafatin hanorin iha eskola neʼebé nia haknaar-an ba. Se labele liu mak tenke hein ano eskolár ramata tiha. Ministériu Edukasaun tenke haree didi’ak,” Bispu hameno.
Jornalista : Osória Marques
Editora : Julia Chatarina
