OÉ-CUSSE, 19 Setembru 2024 (TATOLI) – Diresaun Nasionál Terra no Propriedade (DNTP) Rejiaun Administrativa Espesiál Oé-Cusse Ambeno (RAEOA) arrekada, entre Janeiru no Agostu tinan ne’e, reseita hamutuk $10.535 ba kofre Estadu.
Diretór DNTP Oé-Cusse, Júlio Coel, informa katak reseita ne’e maioria husi sidadaun estranjeiru sira ne’ebé hala’o atividade negósiu, tanba uza rai Estadu no balun aluga uma Estadu.
“Diresaun Terra no Propriedade simu kontratu arrendamentuba sira-ne’ebé uza rai Estadu to’o fulan-Agostu ne’e ita hetan ona osan hamutuk $10.535. Osan sira-ne’e ita depozita iha BNU, liuhusi konta bankária RAEOA nian”, Júlio Coel hateten ba Tatoli, ohin.
Notísia relevante: Terra Propriedade sei regulariza didi’ak arrendamentu rai Estadu iha Oe-Cusse
Nia esplika maneira rekolla reseita ne’e katak arrendatóriu sira mai foti resibu iha Diresaun Terra no Propriedade hodi bá selu direta iha banku.
“Empreza sira-ne’ebé uza ona rai Estadu liuhusi kontratu arrendamentu, ida mak investimentu husi BRI, kompañia EMG no loja estranjeira hanesan Xina sira-ne’ebé hela iha uma Estadu hodi hala’o negósiu”, nia informa.
Nune’e mós empreza timoroan ida ne’ebé halo kontratu arrendamentu hodi uza rai Estadu iha sub-rejiaun Nítibe, ne’ebé kada fulan selu $400-resin ba Estadu, tanba harii fatin hodi tau ekipamentu pezadu atu halo kontrusaun estrada.
“Daudaun ita rejista arrendatáriu 200, tanba balun selu dólar $5 no $10 kada fulan. Ida-ne’e uza ba rezidénsia, maibé sira-ne’ebé uza ba negósiu, entaun nia kontratu ketak, balun bele to’o $400 ba leten kada fulan”, nia adianta.
Nai esplika katak, tuir kontratu arendamentu, bainhira arrendatáriu selebra ona kontratu ho Estadu no la kumpre kontratu referidu ka tarde halo pagamentu bele fó sansaun ka hapara kontratu no bele fó 50% husi valór kontratu mensál nian.
Notísia relevante: SETP koordena Autoridade RAEOA atu uniformiza Servisu Terra no Propriedade
Relasiona ho kontratu arrendamentu sira-ne’ebé uza uma no rai Estadu uza lei númeru 01/2003, 10 Maiu, no nia implementasaun utiliza dekretu-lei númeru 19/2004, 29 Dezembru.
Jornalista: Abílio Elo Nini
Editora: Maria Auxiliadora
