iklan

JUSTISA, HEADLINE, MUNISÍPIU, OÉ-CUSSE (RAEOA)

SETP koordena Autoridade RAEOA atu uniformiza Servisu Terra no Propriedade

SETP koordena Autoridade RAEOA atu uniformiza Servisu Terra no Propriedade

Sekretáriu Estadu Terra Propriedade, Jaime Xavier Lopes, enkontru kortezia ho Prezidente Autoridade RAEOA, Rogério Tiago Lobato. Imajen mídia GPA

OÉ-CUSSE, 04 abríl 2024 (TATOLI) – Sekretáriu Estadu Terra no Propriedade (SETP), Jaime Xavier Lopes, kuarta ne’e, enkontru kortezia ho Prezidente Autoridade RAEOA, Rogério Tiago Lobato no Sekretáriu Rejionál Asuntu Terra Propriedade, Marcelino Marques Coro, hodi koordena planu ba futuru bele uniformiza Servisu Terra Propriedade nian entre RAEOA ho Governu Sentrál.

“Ha’u mai Oé-Cusse ne’e tanba planu no objetivu ida atu halo uniformiza atividade terra nian, prosesu iha nasionál ho Oé-Cusse ne’e, tán ne’e maka ha’u mai aprezenta ba iha Prezidente Autoridade, no ko’alia ho Sekretáriu terra propriedade, karik ba futuru buat balu presiza halo tán ha’u bele fó hanoin nia bele halo, nune’e bele uniformiza prosedimentu iha nasionál ho RAEOA ne’e tenke hanesan,” Jaime Xavier Lopes, informa hafoin  enkontru kortezia.

Notísia relevante: Autoridade RAEOA sei rekolla dadus afetadu ZEESM atu halo kompensasaun

Governante ne’e informa, durante iha enkontru kortezia ne’e, Autoridade propoin kona-bá títulu rai ba sidadaun hotu atu bele sai garantia ba iha kréditu.

“Ohin Prezidente Autoridade dehan katak, atu oinsá bele garantia ema sidadaun hotu, nune’e atu halo levantamentu ruma iha banku, ida-ne’e mós objetivu hotu, oinsa atu fó uluk sertidaun rekoñesimentu títulu ba rai, ikus ba komunidade sira, nune’e ba futuru bele garante ona ema idak-idak nia direitu ne’e bele sai garantia ba iha banku atu asesu kreditu,” nia hateten.

Iha biban hanesan, Sekretáriu Rejionál ba Asuntu Terra Propriedade, Marcelino Marques Coro, agradese, tanba iha Oé-Cusse, komunidade barak maka seidauk iha títulu rai, no mós rai barak afeta direita iha alargamentu estrada sira.

“Daudaun ne’e ita sei formaliza ka uniforme situasaun sira-ne’ebé iha, tanba hosi sekretáriu sesante rai hela servisu ne’ebé maka boot, tanba la rai hela dokumentu no dadus balu, tan ne’e ho prezensa Sekretáriu Estadu ami agradese, ami sei ko’alia asuntu ne’e klean, nune’e bele uniformiza sistema sira, iha Oé-Cusse hanesan mós ho nasionál,” nia katak.

Nia informa, daudaun ne’e sei forma hela ekipa hodi rekolla fali dadus kona-bá komunidade afetadu sira ne’ebé hetan afetasaun iha momentu implementasaun grande projetu ZEESM afeta ba rai no ai-horis, desde 2014 to’o 2018, kontinua hosi 2019 mai to’o 2023, barak mak seidauk hetan pagamentu, maske hetan ona levantamentu hosi Sistema Nasionál Kadastru (SNC, sigla portugés).

Notísia relevante:Terra Propriedade rejista parsela 339 afeta ba konstrusaun estrada nasionál Pante Makasar-Nítibe

Entretantu, iha mandatu Autoridade anteriór, halo ona pagamentu bazea rezolusaun Governu nian, ho númeru 20/2014,  bazea mós rezolusaun RAEOA nian, númeru 2/2023, loron 24 fevereiru, ho valór másima, metru-kuadradu másima dollar $3,00.

Baze ba deklarante  na’in-1.192, bele aumenta no bele menus tanba iha dentru publikasaun iha karik mosu disputa ruma,  nia ho orsamentu ne’e prevee hamutuk millaun $1.6.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!