DILI, 19 setembru 2024 (TATOLI)–Ekipa Sekrataria Estadu Asuntu Toponímia no Organizasaun Urbana (SEATOU) halo despeju administrativu ba uma 12 no rate ida (1) iha Fatuhada iha Estrada entre JL Vila ho ETDA nian ne’e.
Objetivu husi despezu administrativu iha área ne’ebá ne’e atu loke ka alarga estrada husi Fatuhada to’o iha Hudi Laran nian dalan ida mosu iha Klinika CITO ne’e.
“Ohin, ita halo despeju administrativu ba konstrusaun moru no uma hamutuk 12 ho rate ida,” Sekretáriu Estadu Asuntu Toponímia no Organizasaun Urbana (SEATOU), Germano Santa Brites, ba jornalista sira, iha Fatuhada.
Governante ne’e esplika, despeju administrativu ne’ebé ekipa SEATOU halo ne’e, tanba Governu liuhusi Ministériu Obra Públika halo ona kompensasaun no indemnizasaun ba iha populasaun iha área Fatuhada nian.
Nia dehan, populasaun mós halo kooperasaun ho Governu no Sekretária Estadu Terra Propriedade atu bele rezolve situasaun inundasaun no intupidu bee no engarafamentu iha kapitál.
Populasaun sira asina hotu ona akordu ka termu aseitasaun ho Finansa Ministériu Obra Públika nian atu transfere sira nia osan, depois sira bele hadi’a sira-nia sasán sira-ne’ebé hetan estragu ka rahun.
“Buát hotu loos hotu ona. Sasán sira-ne’ebé mak rahun ne’e Governu selu hotu ona. Sasán sira rahun ne’ebé ekipa ba sobu ne’e, Governu sei ba soe hotu iha lixu Tibar nian,” nia dehan.
Loron hirak ne’e, nia hateten, ekipa konjunta SEATOU hahú halo despezu administrativu ne’e iha Aimutin nian no loron ohin ne’e muda mai fali ótel JL Vila nian.
Governante ne’e hateten, ekipa SEATOU sei kontinua sobu iha área Perumnas, Fatumeta, Cristo Rei nian no ponte Kuluhun nian to’o Fatuahi.
Notísia Relevante: Ekipa SEATOU halo despeju administrativu ba uma kain 19 iha Ai-mutin
Jornalista : Jesuína Xavier
Editór : Cancio Ximenes
