DILI, 17 setembru 2024 (TATOLI)–Ekipa konjunta husi Ministériu Obra Públika (MOP) no Sekretária Estadu Asuntu Toponimia no Organizasaun Urbana (SEATOU), tersa ne’e, halo despeju administrativu ba uma kain 19 iha Ai-mutin.
Notísia Relevante: Ekipa SEATOU halo diálogu ho komunidade Ai-mutin kona-ba alargamentu estrada
Objetivu husi despeju administrativu ne’e atu alarga estrada iha diresaun ne’ebá hodi aumenta metru ida-idak iha estrada sorin-sorin iha Ai-mutin nian, tanba ne’e mak iha komunidade hela fatin Governu sobu ka foti medida metru ida, no maioria husi despeju ne’e hetan sobu moru no uma balun mak hetan sobu sorin.
“Iha aldeia Ai-mutin nian ne’e iha uma kain 19 mak hetan despeju administrativu. Sira hotu koopera ho MOP, Sekreáaria Estadu Terra no Propriedade no SEATOU,” xefe Aldeia Ai-mutin, Salustiano Luís Rodrigues Pereira, ba jornalista sira, iha Aimutin.
Xefe suku ne’e hateten, Governu no Polísia Nasionál Timor-Leste halo ona enkontru ho autoridade lokál no populasaun uma kain 19 ne’e iha fulan kotuk hodi bele ba halo despeju administrativu.
Autoridade lokáll ne’e hateten, komunidade sira hatama sira-nia kona bankária (rekening) no to’o agora, uma kain haat mak simu ona sira-nia rekompensasaun.
Iha fatin hanesan, reprezentante komunidade iha Ai-mutin, Jilson José António da Silva, hateten Governu halo rekompensasaun ba sira tuir medida de despeju ne’ebé halo ba sira hodi alarga estrada.
“Ema balun hetan ona osan no balun seidauk hetan. Maibé, Governu foti ona númeru rekening hodi bele transfere osan ba rekompensasaun. Osan, ha’u-nia maun nian ne’e tama ona iha tuku lima lorokraik horisehik,” Jilson José António da Silva relata ba jornalista sira.
Nia dehan, Governu ho autoridade seguransa no lokál hala’o enkontru ho populasaun iha fulan kotuk no iha konkordánsia hakarak kontribui ba dezenvolvimentu nasionál.
Tuir observasaun Tatoli, ekipamentu pezadu sira husi Ministériu Obra Públika komesa ona sobu moru balun ne’ebé besik estrada no ekipa Eletrisidade De Timor-Leste komesa koa fiu eltrisidade hodi fasilita servisu ekipamentu pezadu.
Jornalista : Jesuína Xavier
Editór : Cancio Ximenes
