DILI, 19 setembru 2024 (TATOLI)—Diretór Nasionál Infrastrutura no Edukativu iha Ministériu Edukasaun (ME), Helio Lopes, konsidera morru protesaun ba resintu eskola ne’e importante atu iha seguransa di’ak no animál sira labele tama bá resintu eskola, maibé daudaun ne’e sei tau prioridade uluk ba fasilidade eskolár ne’ebé urjente.
“Maioria eskola iha territóriu laiha morru protesaun, maibé Ministériu Edukasaun nafatin tau prioridade. Maski nune’e, Ministériu Edukasaun nia prioridade liu mak fasilidade ne’ebé urjentemente hanesan konstrusaun no reabilitasaun saladeaula, biblioteka, no laboratóriu. Entaun, kona-ba morru protesaun ita sei reabilita ka halo konstrusaun ba eskola ida ka rua ne’ebé presiza,” Diretór Nasionál hateten ba Agência Tatoli, iha ninia knaar fatin, Vila-Verde, kuarta ne’e.
Notísia relevante : Autoridade Viqueque lansa projetu konstrusaun morru protesaun ESJ Sabika Besi Kulit
ME aloka ona orsamentu atu hadi’a no harii saladeaula hamtuk 1.000-resin ne’ebé daudaun ho kondisaun a’at.
“Ita presiza konsentra orsamentu ba rezolve kondisaun saladeaula tanba fasilidade ne’e importante tebes hodi bele apoiu ensinu aprendizajen diretamente iha kada eskola. Tanba ne’e mak Ministériu Edukasaun tinan ba tinan kontinua investe no aloka orsamentu ba Diresaun Nasionál Infraestrutura hodi halo reabilitasaun no konstrusaun ba saladeaula sira iha eskola iha nível eskolaridade,” nia akresenta.
Eskola sira ne’ebé presiza morru protesaun mak hanesan Pre-Eskolár Caridade Quintal kiik, Eskola Ensinu Sekundáriu Jerál (ESJ) 05 maiu, ESJ Fitun Naroman Timor-Lorosa’e (FINANTIL), ESJ 04 setembru Balide, no seluk tan.
Iha sorin seluk, Diretora Eskola Pre-eskolár Caridade, Romana Oliveira, husu ba ME atu halo morru protesaun ba eskola ne’e.
“Ha’u husu ba Ministériu Edukasaun atu halo mós morru protesaun ba ami-nia eskola, ita haree eskola foun ne’e di’ak ona, entaun tenke iha morru, nune’e animál labele tama mai laran hodi estraga sásan eskola. Eskola ida-ne’e Pre-eskolár, entaun presiza duni morru protesaun hodi nune’e asegura labarik kiik-oan sira,” nia tenik.
Totál estudante iha eskola ne’e hamutuk 185, iha sala rua ba Pre-Eskolár 0 kiik no sala rua ba 0 boot, ne’ebé kada sala akumula estudante 25 no balun to’o 28.
Jornalista : Osória Marques
Editora : Julia Chatarina
