Autoridade Viqueque lansa projetu konstrusaun morru protesaun ESJ Sabika Besi Kulit

VIQUEQUE, 28 fevereiru 2024 (TATOLI)— Autoridade munisípiu Viqueque liuhosi Programa Nasionál Dezenvolvimentu Suku (PNDS) 2024 lansa projetu konstrusaun moru protesaun hale’u Ensinu Sekundáriu Jerál (ESJ) Sabika Besi Kulit iha suku Matahoi, postu administradór Uatulari, munisípiu Viqueque.

Hafoin lansamentu moru protesaun ba ESJ Sabika Besi Kulit, Reprezentante Administradór munisípiu Viqueque, Cosme Sarmento, hatete lansamentu programa PNDS ba tinan 2024 ba suku Matohi ne’ebé deside kria moru protesaun ida-ne’e hodi proteje no sai hanesan seguransa ida ba ESJ Sabika Besi Kulit.

Notísia relevante:ESJ Sabika Besi Kulit Uatulari presiza morru protesaun

“Ohin, sai hanesan oportunidade di’ak ida ba ESJ Sabika Besi Kulit tanba ita hahú hatu’ur fatuk dahuluk hodi konstrui ba eskola ida-ne’e. Atu nune’e eskola ida sai seguru no asegura ba buat hotu ne’ebé fó ameasa ba eskola”, hatete Reprezentante Prezidente Autoridade Munisípiu Viqueque, Cosme Sarmento hafoin lansa projetu ne’e iha suku Matahoi-Viqueque.

Eskola nu’udar fatin ida-ne’ebé forma ema, nune’e presiza mós kria kondiasaun hodi estudante sira partisipa prosesu apredijazen bele  la’o hakmatek no haketak husi movimentu barullu sira.

Tanba ne’e, Programa PNDS fó apoia ba eskola hodi konstrui moru protesaun asegura edifísiu eskola Sabika Besi Kulit bele hetan seguransa ida di’ak.

Iha fatin hanesan, Reprezentante Sekretáriu Ezekutivu ST-PNDS, Marito Pinto, husu ba  Ekipa Jestaun Suku (EJS) presiza servisu makas hodi halo jestaun no kontrolu atu konstrusaun bele la’o di’ak.

Projetu Konstrusaun moru protesaun medida 448,60 metru kuadradu no ho orsamentu  mai husi PNDS ne’ebé aloka ba suku Matatahoi ho totál   $48.750.00. Durasaun servisu durante fulan haat ne’ebé sei implementa husi abitante suku Matahoi.

ESJ Sabika Besi Kulit agradese

Entretantu, Diretór ESJ Sabika Besi Kulit Uatulari, Adelino da Cruz, agradese ba Governu liuhosi PNDS bele deside tau prioridade hodi konstrui protesaun ba eskola hodi asegura prosesu apredijazen.

“Ha’u agradese tebes-tebes ba Governu liuhusi PNDS ne’ebé deside ona halo moru protesaun ba ami-nia eskola hodi prosesu aprendijazen bele la’o di’ak, animál labele tama”, nia afirma.

Tuir dadús estudante husi ESJ Sabika Besi Kulit totál hamutuk na’in-754 no profesór totál hamutuk na’in-22.

Jenerál Sabika enkoraja estudante

Brigadeiru FALINTIL Forsa Defesa Timor Leste (F-FDTL), Jenerál Cornélio Americo Simenes ‘Sabika Besi Kulit’ enkoraja estudante Sekundáriu Jerál (ESJ) Sabika Besi Kulit atu estuda ho di’ak hodi sai ema ne’ebé matenek.

“Se estudante ida ba eskola maka hanoin de’it problema, Entaun di’ak liu estudante ne’e lalika ba eskola tanba eskola la’ós ba fatin baku malu no kria problema. Atu sai ema loloos ne’e tenke matenek. Nune’e ha’u rekomenda ba estudante sira halo tuir edukadór sira”, Jenerál Sabika fó hanoin ba estudante sira

Jenerál Sabika sujere ba estudante sira tenke estuda no respeita manorin sira tanba  manorin sira sakrifika sira-nia tomak hodi hanorin estudante sira.

“Iha ami-nia tempu eskola iha Uatulari, maibé primeira klase, nune’e ba segundu klase ami tenke ba buka eskola iha Ossu foin asesu ba eskola, maibé tempu agora eskola besik hela imi ne’e tenke aproveita”, nia konta.

Tuir dadús estudante ESJ Sabika Besi Kulit ba tinan anu letivu 2024 ho totál hamutuk 754, kompostu husi klase 1 husi siénsia Teknólojia na’in-97, Siénsia Sosiais Humanidade (SSH) na’in-45,   klase 2 husi siénsia Teknólojia na’in-136, Siénsia Sosiais Humanidade (SSH) na’in-131 no klase 3 husi siénsia Teknólojia hamutuk na’in-172, Siénsia Sosiál Humanidade (SSH) hamutuk na’in-173. Ho totál profesór hamutuk na’in-22.

Notísia relevante:Estudante ESJ Sabika Besik Kulit Uatulari 287 sei partisipa ezame nasionál

Jornalista : Vitorino Lopes da Costa

Editór       : Florencio Miranda Simenes