DILI, 19 setembru 2024 (TATOLI)–Ministériu Edukasaun (ME) la aloka verba ruma iha Orsamentu Jerál Estadu (OJE) tinan 2025 nian ba akizisaun karteira eskolár (meza no karteira) tanba sufisiente hela.
“Ita agora iha hela meza no kadeira, balun sei mai tan iha fulan-setembru tanba ita halo ona prosesu aprovizionamentu,” Diretór Nasionál Infrastrutura no Edukativu iha ME, Hélio Lopes, informa ba Agência Tatoli, iha ninia knaar fatin, Vila-Verde, kinta ne’e.
Karteira eskolár ne’ebé sei to’o Timor iha fulan-setembru ne’e hamutuk iha 9.000-resin, nune’e sufisiente ona bainhira distribui ba eskola sira iha territóriu inklui eskola sira ne’ebé aumenta saladeaula.
“Ita-nia ekipa bá haree iha eskola, sira dehan kadeira no meza laiha, ne’e lae. Kadeira no meza iha hela maibé Diretór Eskola sira mak tenke halo jestaun no kontrollu. Tanba ita prepara de’it ba eskola ne’ebé presiza no ida-ne’ebé kondisaun a’at duni mak ita troka. Ida-ne’e mak tau ba importánsia no ita prepara ba saladeaula foun sira,” nia akresenta.
Notísia relevante : ME distribui tan karteira eskolár 90 ba ESTV Guissarudo Ermera
Tuir ME nia monitorizasaun iha eskola sira, karteira eskolár sufisiente hela ba tinan ida-ne’e no tinan oin.
Iha 03 setembru liubá, ME distribui ona karteira eskolár 90 ba Eskola Guissarudo Hatulia B, iha munisípiu Ermera, ne’ebé hanesan eskola hetan distribuisaun ikus.
Iha sorin seluk, Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, husu ba Diretór Eskola tenke kuidadu no halo kontrolu ba infraestrutura eskolár sira nune’e labele a’at lalais.
“Xave importante mak presiza halo jestaun di’ak. Karteira eskolár ne’ebé ekipa lori mai entrega iha eskola, husu ba eskola sira atu uza ho kuidadu durante prosesu ensinu aprendizajen,” governante ne’e hameno.
Jornalista : Osória Marques
Editora : Julia Chatarina
