DILI, 03 setembru 2024 (TATOLI)—Ministériu Edukasaun (ME), iha semana kotuk ne’e, distribui karteira eskolár (meza no kadeira) 90 ba Eskola Guissarudo Hatulia B, iha munisípiu Ermera.
“Ministériu Edukasaun fahe hotu ona karteira eskolár ba Eskola Ensinu Sekundáriu Tékniku Vokasionál sira, ne’ebé distribuisaun ba Eskola Guissarudo iha Ermera ne’e mak hetan oportunidade ikus,” Sekretáriu Estadu Ensinu Sekundáriu Tékniku Vokasionál, Domingos Lopes Lemos, informa iha Vila-Verde, segunda ne’e.
Tanba ne’e, ME husu ba Diretór Edukasaun munisipál atu halo pedidu ruma koba-ba karteira ne’ebé eskola presiza.
“Karteira eskolár ne’ebé ekipa lori mai entrega iha eskola, husu ba eskola sira atu uza ho kuidadu durante prosesu ensinu aprendizajen,” nia akresenta.
Notísia relevante : ME distribui karteira eskolár 120 ba Eskola EBC Farol
Aleinde ne’e, ME iha planu atu halo investimentu ba Eskola Tékniku Vokasionál no Ensinu Sekundáriu Jerál iha futuru, liu-liu ekipamentu prátika.
Iha sorin seluk, Diretór Eskola Sekundáriu Tékniku Vokasionál Guissarudo, Marito dos Santos, orgullu tanba ME liuhusi Sekretáriu Estadu bele oferese ona kadeira no meza mai eskola, ne’ebé bele tulun ona eskola.
Jornalista : Osória Marques
Editora : Julia Chatarina
