DILI, 19 setembru 2024 (TATOLI)—Prezidente Parlamentu Nasionál (PPN), Maria Fernanda Lay, hateten tuir planu iha proposta orsamentu privativu PN nian ne’ebé prevee ba tinan oin sei sosa karreta foun ba Deputadu na’in-65.
Notísia Relevante: PN prevee millaun $4-resin atu sosa karreta ba Deputadu sira
Nia dehan, sosa karreta nu’udar dever no hola fasilidade tuir lei hateten, agora dehan labele, klaru katak labele fó karreta rua ba ema ida, kareta agora nian ne’e depois avaliasaun tinan kotuk ka tinan korrente labele hola, tanba horibainhira tau subsídiu lei la fó dalan.
“Tanba ne’e mak ha’u deside inisiativa halo proposta tau iha ne’eba. Se Deputadu sira hakarak okey no lakohi ne’e laiha buat ida, ami bele hasai. Sei sosa karreta fó ba Deputadu 65, afinálhotu-hotu hakarak. Simplismente, lakohi iha votasaun mak ita haree took,” Nia hateten ba jornalista sira hafoin ramata enkontru líder banakda parlamentár iha PN, kinta ne’e.
Maibé, nia dehan, seidauk iha desizaun ba osan viajen estranjeiru ka sosa karreta mak atu hasai iha proposta orsamentu privativu PN nian, nune’e labele rua dala ida de’it, tanba se aprova hotu tau iha tetu kontinua millaun $23-resin tuir proposta orsamentu privativu PN nian ba tinan oin.
Tanba, tuir nia, Ministériu Finansa (MF) fó mai PN tetu milaun $20 de’it, nune’e PN tenke kaer ba tetu ne’ebé komite revizaun fó.
Maibé ida-ne’e se labele, entaun iha dalan durante debate Orsamentu Jerál Estadu (OJE) 2025 iha tempu tuir mai bele halo reabertura ba orsamentu PN nian bele adia fila-fali se intensaun deputadu sira-nia nune’e.
Nia fundamenta katak, iha nesesidade atu sosa karreta foun tanba karreta sira-ne’ebé daudaun Deputadu sira uza barak mak kondisaun ladiak ona.
“Barak mak ladi’ak, ita boot sira la rona semana-semana prezidente tenke haree manutensaun. Nune’e, ida karreta 35 ne’ebé hola ba sira-ne’ebé re-eleitu uza nafatin karreta lejislatura datoluk nian, ne’ebé agora tinan 12 ona. Tuir loloos, karreta ho kondisaun ne’ebé uza ba sa’e foho, ita hatene ita-nia infraestrutura ladi’ak, bainhira nia manutensaun boot-liu mak ita-nia gastu boot-liu. Ho razaun ne’e, nu’udar Prezidente PN propoin atu sosa foun iha tinan oin, maibé ne’e depende ba desizaun deputadu 65nian,” nia hateten.
Agora, nia hateten, Deputadu maiória uza karreta operasionál tanba kareta ne’ebé iha kondisaun ladi’ak hotu ona.
“Se aban bainrua hola karreta, ne’e mós ami fó fali patrimóniu Estadu hodi halo leilaun, tanba karreta balun hancur. Tanba, Deputadu sira mós laiha kuidadu atu uza fasilidade ne’ebé fó, depois hatete Pajero kondisaun ladi’ak maibé sosa ita mak deside sosa. Ha’u la tama iha hili kareta saida, ne’e mak ohin ha’u ko’alia iha ne’e, ha’u se hakarak hola de’it karreta Avanza barratu, mais labele sa’e ba foho leten. Papél Deputadu mak fiskalizasaun, se ita haree kompara PN ho Governu guarda costa de’it mós sa’e Prado, tanbasá Deputadu labele,” nia dehan.
Nune’e, nia dehan, klaru katak públiku bele superviziona uzu fasilidade PN nian ba atividade privadu mak labele.
Jornalista : Nelson de Sousa
Editór : Cancio Ximenes
