OÉ-CUSSE, 20 Setembru 2024 (TATOLI) – Diresaun Rejionál Agrikultura Rejiaun Administrativa Espesiál Oé-Cusse Ambeno (RAEOA) sei fó apoiu ba implementasaun Projetu Redusaun Risku Klimátiku iha Timor-Leste no Indonézia (CRITICAL) iha Oé-Cusse, liuhusi prezensa tékniku estensionista no guarda florestál sira.
Diretór Rejionál Agrikultura Oé-Cusse, Amaro Efi, informa katak Projetu CRITICAL persiza hetan apoiu, tanba setór tolu liga direita ba servisu agrikultura nia no alvu mak sei implementa iha área rurál sira.
“Tékniku estensionista na’in-27, inklui koordenadór koloka ona iha suku 18 iha Oé-Cusse. Suku ne’ebé boot koloka na’in-rua hanesan Bobometo A no B, suku Abani iha Pássabe, suku Costa mós hanesan. Ba guarda florestál mak na’in-16, sira la koloka ba suku, maibé destaka de’it iha sub-rejiaun haat. Sira-nia prezensa iha suku atu apoia komunidade liuliu ba Projetu CRITICAL ne’e”, Amaro Efi dehan ba Tatoli iha Oé-Cusse, ohin.
Notísia relevante: WN-MAPPF selebra akordu hodi reforsa Projetu CRITICAL iha Bobonaro no RAEOA
Dirijente Agrikultura Oé-Cusse ne’e agradese tanba CRITICAL ne’e importante atu dezenvolve atividade agrikultór sira, liuliu iha área rurál. Tanba ne’e, Governu labele la’o mesak, maibé bainhira iha parseiru apoia mak foin iha forsa no forsa ne’e la’ós ema idak nian, maibé ema hotu ho objetivu ba povu.
Nia lembra katak, iha fulan hirak liubá, Sekretária Rejionál Agrikultura hamutuk ho Organizasaun Internasionál Naun-Governamentál (ONG) World Neighbors (WN) halo ona lansamentu ba Programa CRITICAL ne’e iha Oé-Cusse. Depois kontinua halo lansamentu ikus iha munisípiu Bobonaro.
“Husi parte agrikultura, ha’u hanoin programa ne’e sei fó benefísiu, tanba atu sai hanesan programa uluk In Crizing Community Resilience in Oé-Cusse ka Haforsa Reziliente Komunidade iha Oé-Cusse, ne’ebé agrikultura Oé-Cusse apoia. Teknikamente ita-nia guarda florestál no estensionista suku sira prontu atu koopera no prontu atu fasilita tékniku”, nia promete.
Notísia relevante: Suku 14 iha Oé-Cusse no Bobonaro sai alvu ba Projetu CRITICAL
Rekorde katak, iha loron 17 Setembru, World Neighbors selebra ona akordu kooperasaun téknika ho Ministériu Agrikultura, Pekuária, Peska no Floresta (MAFFP) hodi haforsa Projetu Redusaun Risku Klimátiku iha Timor-Leste no Indonézia atu implementa iha munisipíu Bobonaro no RAEOA.
Jornalista: Abílio Elo Nini
Editora: Maria Auxiliadora
