DILI, 20 setembru 2024 (TATOLI)–Prezidente Repúblika, José Ramos Horta, hateten la nesesáriu sosa karreta ba deputadu ho folin karun, tanba iha viatura kualidade ho presu baratu iha merkadu ne’ebé bele sosa ba deputadu sira iha Parlamentu Nasionál.
Notísia Relevante: Proposta orsamentu privativu 2025 sei sosa karreta ba deputadu 65
“Lalika gasta osan buka karreta Prado ne’e. Karreta husi Xina kualidade no ha’u rona 30 e tal dolar de’it, ne’e metade presu husi karreta Toyota,” Prezidente Repúblika, José Ramos Horta, ba jornalista sira iha Eskola Téknika Becora.
Nia esplika, agora iha karreta ne’ebé kualidade no baratu husi Xina ne’ebé deputadu sira bele uza ba serbisu loro-loron, tanba ne’e mak la nesesariu ba sosa karreta foun ho presu aas.
“Ha’u la’ós halo propaganda komersiál ba Xina, bainhira iha amu Papa nia vizita ne’e, ha’u haree karreta foun seguransa nian, kareeta ne’e kapaas, karreta ne’e mai husi ne’ebé, mai husi Xina. Ema hotu-hotu hateten, karreta ne’e mai husi Xina ho kualidade di’ak loos, konfortavel no barratu ho 30 mil dolare de’it. Klaru deputadu sira presiza mobilidade,” nia dehan.
Xefe Estadu ne’e mós hateten membru Governu sira la presiza hetan karreta ida-idak, maibé iha karreta balun ne’ebé bele uza koletivamente hodi uza ba serbisu.
“Se ha’u mak Primeiru-Ministru, ha’u dehan laiha karreta no uma ba ministru sira. Molok ba ministru ó hela iha ne’ebé, la hela iha ponte Comoro okos, depois simu kustu ba uma, viajen ba foho. Ita mak kria rasik buat ida-ne’e. Karreta ba membru Governu tenke iha sanulu ida henesan ne’e, kuandu presiza telefone ba fatin parkir karreta nian. Iha Austrália sira halo hanesan ne’e,” Ramos Horta sujere.
Prezidente Repúblika husu ba membru Parlamentu Nasionál no Governu atu labele lori karreta sira-ne’ebé simu, karreta sira-ne’e proprietáriu Estadu nian. la’ós tinan lima hotu lori fali ba uma,” nia dehan.
Ramos Horta mós sujere ba xefe Governu atu kontrola membru Governu sira-nia viajen, tanba sai membru Governu tenke ezekuta sira planu no programa prioridade.
“Ministru ne’e kargu governante, nia tenke ezekuta nia programa no orsamentu. Se nia ba li’ur beibeik,depois fila mai laiha follow up no segimentu, entaun viajen razaun saida, dala ida ka rua, ita komprende,” nia hateten.
Xefe Estadu mós konsidera katak estudu viabilidade husi deputadu sira iha rai-li’ur sira-ne’e laiha nesesariu.
“Estudu besik nasaun sira besik hanesan Fiji no Indonézia. Estudu viabilidade sempre util. Maibé la nesesariu beibeik, bele tinan ida dala ida,” nia dehan.
Jornalista : Jesuína Xavier
Editór : Cancio Ximenes
