OÉ-CUSSE, 20 Setembru 2024 (TATOLI) – Rezidénsia ba pesoál saúde sira hamutuk unidade tolu ne’ebé harii iha 2017, husi empreza konstrutora Afafat Unipessoal Lda iha suku Bene-Ufe, iha aldeia Citrana, bairru Baoknana, to’o agora seidauk entrega ba Governu atu utiliza.
Xefe Sentru Saúde Nítibe, António Fernandes Caet, informa katak pesoál saúde sira tenke toba de’it iha sala maternidade sentru saúde hodi fó atendimentu ba pasiente sira tanba fatin laiha.
“Rezidénsia Baoknana momentu harii ha’u akompaña tanba ha’u serbisu kedan iha Baoknana. Obra ne’e hahú iha 2017, maibé ami lahatene tanba saida mak to’o agora seidauk entrega. Durante ne’e, ami okupa de’it fatin maternidade, ami okupa kuartu tolu iha laran hodi fó atendimentu ba komunidade”, António Caet adianta ba jornalista sira iha Baoknana.
Notísia relevante: Sekretáriu Saúde Rejionál solusiona problema falta bee-moos iha Postu Saúde Bitila
Iha fatin hanesan, Sekretáriu Rejionál ba Asuntu Saúde, Luís de Jesus Neno, reforsa katak rezidénsia ba pesoál saúde Baoknana halo iha 2017, maibé to’o agora empreza seidauk entrega, nune’e seidauk bele uza.
“Ami mós halo karta ba Obra Públika no sira hamutuk ho ADN mai halo ona fiskalizasaun, maibé to’o ohin ami seidauk hetan rezultadu. Karik kompañia ho Obra Públika hakotu tiha ona pagamentu ka oinsá, bele entrega ona tanba agora pesoál barak hela iha klínika maternidade. Ema partu mai iha kuartu sorin, pesoál saúde sira toba iha sorin, ida-ne’e ita haree ladi’ak”, nian lamenta.
Tanba ne’e, atu solusiona problema referidu dirijente saúde ne’e orienta ona pesoál saúde sira hodi muda bá toba iha postu saúde Manán.
“Ha’u orienta ona sira tenke sai, toba iha postu saúde Manán, balun toba atu atende kazu urjénsia iha tempu kalan. Mezmu obra ne’e seidauk entrega, entaun ami-nia solusaun tenke mai hela temporariamente iha ne’e [postu saúde Manán], tanba kuartu barak. Ba sira-ne’ebé iha transporte, loron bá serbisu, kalan mai toba iha ne’e”, nia realsa.
Tuir observasaun jornalista Tatoli, projetu ne’e atinje ona 100%, maibé vidru odamatan komesa aat ona no animál sira mak husik hela iha fatin ne’e.
Notísia relevante: Pesoál Saúde Baoknana Preokupa Movimentu Balada Sira
Jornalista Tatoli tenta atu konfirma empreza konstrutora ne’e, maibé seidauk hetan no kontinua buka tuir. Nune’e mós tenta konfirma asuntu ne’e ho Diresaun Rejionál Infraestrutura (DRI) Oé-Cusse, maibé rejeita fó informasaun tanba okupadu ho serbisu seluk.
Projetu ne’e ezekuta husi empreza Afafat Unipessoal Lda, ho valór kontratu hamutuk $187.406,37 ho durasaun serbisu fulan tolu.
Jornalista: Abílio Elo Nini
Editora: Maria Auxiliadora
