DILI, 20 setembru 2024 (TATOLI)-Portavóz Polísia Sientifika Investigasaun Kriminál, Mario Taves, hateten, PCIC halo ona identifikasaun ba ema na’in tolu liga ho kazu Diretór-jerál Servisu Kooporativu, Ministériu Agrikultura, Peska, Peskuária no Floresta (MAPPF) ho inisiál RG.
Nia dehan, ema na’in tolu ne’ebé mak PCIC halo ona identifikasaun mak hanesan Diretór-jerál Servisu Kooporativu, MAPPF ho inisiál RG, hodi halo ezaminasaun ba nia telefone enkuantu ba ema na’in rua seluk ne’ebé mak liga kazu ne’e.
“PCIC halo ona identifikasaun ba sira seluk ne’ebé maka iha koñesimentu ba faktu sira ne’e. Ita halo identifikasaun ba Diretór ne’e liuliu halo ezaminasaun ba iha nia telefone hanesan saida mak Diretór ko’alia ona iha mídia katak PCIC halo ona ezaminasaun ba nia telefone,” Mario Taves hateten ba TATOLi iha nia kna’ar fatin PCIC Colmera, sesta ohin.
Portavóz dehan, PCIC halo ona ezaminasaun ba Diretór ne’e nia telemovél, tanba atu haree kona-ba númeru telefone ne’ebé momentu ne’e halo konversasaun ho Diretór hanesan saida mak postin iha rede sosiál.
“Durante prosesu identifikasaun ne’e direitor nee koopera tebes hodi fó nia telefóne ami halo ezaminasaun. Rezultadu ezaminasaun ba telemovél ne’e, PCIC seidauk konklui kuandu, maibé konklui ona mak sei remete ba Ministériu Públiku,” nia dehan.
Tavares hateten, kazu Diretór Jerál MAPPF ne’e husi Komisaun Anti Korrupsaun mak inísia no PCIC halo ezaminasaun ba telefone inklui halo identifikasaun ba ema balun ne’ebé ligasaun ho kazu ne’e.
“Prosesu ida ne’e CAC mak inisia tanba ne’e CAC mak foti ema sira ne’ebé deskonfi iha ligasaun ba kazu ne’e PCIC hanesan atu kompleta de’it faktu balun de’it, maibé prosesu hotu-hotu CAC ninian,” nia konklui.
Notísia relevante:CAC submete ona auto notísia kazu diretór jerál RG ba Ministériu Públiku
Jornalista: Natalino Costa
Editór : Rafael Ximenes de A. Belo
