DILI, 25 setembru 2024 (TATOLI) – Komisáriu Komisaun Anti-Korrupasaun (CAC, sigla portugés), Rui dos Santos, dehan CAC submete ona auto notísia ba kazu diretór jerál ho inisiál RG ne’ebé suspeita ba kazu fó projetu ba nia maluk iha Ministériu Agrikultura, Peska Pekuaria no Floresta (MAPPF).
Komisáriu CAC ne’e esplika, CAC hanesan orgaun polísia kriminál ne’ebé iha kompeténsia tuir lei haruka hodi halo identifikasaun ba ema ida de’it iha oras 12 nia-laran, hafoin ida-nee, CAC tenke halo auto partisipasaun hodi hato’o ba Ministériu Públiku.
“Komisáriu atu update de’it katak servisu identifkasaun ne’ebé Komisaun Anti-Korrupasaun konklui ona prosesu ba pesoál tékniku ka dirijente Ministériu Agrikultura Peskas, Pekuaria no Floresta. Informasaun ne’ebé ita iha, relatóriu ita enkamiña ona ba Ministériu Públiku iha segunda (23/9) foin daudaun ne’e”, Rui hateten ba jornalista iha nia kna’ar fatin CAC Farol, kuarta, ohin.
Nia dehan, bazeia ba rezultadu indentifkasaun, CAC deteta katak iha duni indísiu katak RG envolve duni iha kazu fo projetu ba nia amigu Ministériu Agrikultura Peskas, Pekuaria no Floresta ne’ebé virál iha mídia sosiál.
“Portantu ami hatama ne’e ho razaun balun katak iha indísiu, tanba ne’e ami enkamiña ba Ministériu Públiku para sira rejista no sira sei haree iha buat balun ne’ebé mak sira sente CAC presiza kompleta tan, entaun Ministériu Públiku sei haruka fila fali mai CAC hodi rekolla informasaun hodi kompleta “, nia adianta.
Rui dehan, prosesu idenfikasaun ba RG, CAC rekolla evidénsia sira mak hanesan telemovel, hodi haree mensajen sira iha Watshapp no iha voice ne’ebé durante nia uza ho lian materna hodi haruka ba nia kolega.
“Ekipa sira mós halo ona transkrisaun ba voice sira iha dirijente ne’e nia telemovel, tanba ita hetan voice ida iha nia watshapp iha ema ida koalia lian materna. Entaun ami halo koordenasaun ho PCIC hodi sira bele halo ezaminasaun ba dijente ne’e ninia telefone. Tanba PCIC mak ekipamentu hodi halo ezaminasaun forensik Information and Technology nian hodi haree mesajen no voice sira ne’e. Tanba ita tauk keta laos nia mak halo karik ou iha ema seluk mak halo”, nia afirma.
Tuir nia, CAC hanesan polísia espesializada, nia poder iha de’it investigasaun, maibe CAC laiha fasilidade atu halo ezaminasaun sira hanesan ne’e, tanba nee iha prosesu CAC la mesak, maibé serbisu koordenasaun ho PCIC tanba sira mak iha meius kona-ba ezaminasaun ba telefone, kuandu mesajen sira ita bele apaga, maibé ho meius ne’ebé sira bele dada fila fali.
Dirijente CAC konsidera prosesu ne’e hanesan segredu justisa tanba ne’e CAC lakohi haklean liután faktu sira ne’ebé aprezenta iha prosesu ne’e.
“Agora ami enkamiña ona ba Ministériu Públiku no ami hein bainhira mak Ministériu Públiku delega fali mai CAC mak ita sei bolu ema sira liga kazu ne’e. Hanesan testamuña na’in hira, dokumentu saida mak presiza. Telemovel sira ne’ebé sira uza hodi halo komunikasaun”, nia konklui.
Notísia relevante : CAC bele aprezenta relatóriu investigasaun kazu dirijente MAPPF ba MP
Jornalista: Natalino Costa
Edutór : Zezito Silva
