NOVA YORKE, 21 setembru 2024 (TATOLI) – Organizasaun Intergovernamentál g7+, sábadu loraik ne’e, partisipa konferénsia nivél aas iha edifísiu Organizasaun Nasaun Unida (ONU), Nova Yorke, ne’ebé partisipa husi nasaun hotu iha mundu, hodi relata no husu fó importánsia ba diálogu inkluziva, rekonsiliasaun no pás.
“Konferénsia nivél aas ida ne’e pontu importante tolu mak g7+ foka hanesan paralelu kona-ba prevensaun konflitu mak ita ko’alia primeiru, fó importansia kona-ba diálogu inkluzivu, rekonsiliasaun, segundu oinsá ita tenke promove nafatin pás iha nasaun laran, ikus liu ami husu iha konferénsia ne’e mak ba nasaun hotu tenke utiliza mekanizmu dalan diálogu ne’ebé g7+ promove ona,” Sekretariu Jerál Helder da Costa hateten ba Agência TATOLI iha edifisiu ONU, sabadu ne’e.
Nia dehan, durante enkontru ne’e komunidade internasionál sira preokupa kona-ba oinsá tenke tau orsamentu hamutuk hodi haree ba nasaun barak ne’ebé daudaun ne’e hasoru hela dezastre naturál no mudansa klimátika.
“Sira husi Islamic Development Bank, Arabe Development Bank, Banku Mundiál no barak los ko’alia sira nia komprimisiu atu kontinua buka maneira oioin atu tau finansiamentu ba mudansa klimatika,” nia afirma.
Durante konferénsia ne’e, g7+ husu ba komunidade internasionál sira kontinua uza dalan diálogu hodi lori moris di’ak ba nasaun idadak atu hadook aan husi konflitu.
Iha konferénsia ne’e hasa’e liutan vizibilidade g7+ nian iha komunidade internasionál liuliu atu lori pás ba ema hotu iha mundu.
Rekorda fali katak, ONU rekoñese ofisialmente karta organizasaun intergovermentál (charter) ba país afetadu konflitu g7+ sai organizasaun ida multilateral iha tinan 2021.
Maibé g7+ hetan nia estatu hanesan observadór ba Nasaun Unida iha tinan 2019 liuba.
Tanba tuir artigu 102 UN charter hateten momoos katak kuálker rekezitu intergovernamentál ida ne’ebé rejistradu iha Nova Iorque tenke iha charter, maibé to’o ikus g7+ prienxe rekezitu juridiku, politiku no institusionál tanba hetan suporta makas hosi Estadu Timor-Leste no Estadu membru sira seluk to’o hetan estatutu ida ne’e.
g7+ harii iha 10 abríl 2010, nuudar organizasaun intergovernamentál ne’ebe halibur hamutuk nasaun 20 ne’ebé afetadu hosi konflitu no frajilidade, hodi halo advokasia ba harii pás no harii Estadu hanesan xave ba dezenvolvimentu ne’ebé sustentavél.
Membru organizasaun internasionál g7+ kompostu hosi Timor-Leste, Afganistão, Burundi, Repúblika Centro-Africana, Chade, Comores, Costa do Marfim, República Democratica do Congo, Guiné, Guiné-Bissau, Haiti, Libéria, Papua Nova Guiné, Serra Leoa, Somália, Ilhas Salomão, São Tomé Príncipe, Sudão do Sul, Togo no Iémen
Enkuantu, g7+ nian Prezidente mai hosi Serra Leoa no Timor-Leste mak sai uma nain ho kuartél jerál iha Dili, edifísiu ida iha Lisboa, Portugál no ida dadaun ne’e iha Nova Yorke.
Notísia relevante:g7+ organiza simeira iha ámbitu Asembleia Jerál ONU ba dala-79
Jornalista: Hortencio Sanchez
Editór: Florencio Miranda Ximenes
