DILI, 23 setembru 2024 (TATOLI)–Vise-Reitór Asuntu Akadémiku no Garantia Kualidade iha Universidade Nasionál Timor-Lorosa’e (UNTL), Samuel Freitas, konsidera instituisaun Estadu sira presiza promove lian ofisiál.
“Iha UNTL ne’e di’ak liután promove tanba hanesan instituisaun Estadu di’ak liu promove lian ofisiál inklui lian portugés hakarak sai ezemplu, tanba ne’e mak durante ne’e halo kolaborasaun ho Portugal liuhusi Institutu Camões iha modalidade barak desde UNTL harii husi tinan hirak liubá, hahú kooperasaun ho Portugal atu hadi’a lian portugés,” Vise-Reitór hateten ba Agência Tatoli, iha ninia knaar fatin, segunda ne’e.
Notísia relevante : Tribunal Promove Lian Ofisiál iha Audiénsia Julgamentu
UNTL daudaun ne’e iha projetu foun ne’ebé atu hotu ona ho naran projetu Formar, Orientar, Certificar e Otimizar (FOCO). Projetu ne’e atu forma lian portugés ba ema barak, liu-liu forma dosente na’in-11 sai profisionál iha sira-nia hanorin lian portugés ba sira seluk to’o fó sertifikasaun.
“Sertifikasaun ne’ebé ita fó liuhusi projetu FOCO ne’e susesu fó ba ema kualker, se ita kursu lian portugés hetan sertifikadu ida-ne’e vale ba fatin-fatin atu kursu ka eskola ruma. Tanba ne’e, kolaborasaun iha tinan oin tenke kontinua tanba iha ne’e susar oituan se ita iha ne’e ko’alia portugés maibé iha li’ur portugés, avizu sira iha kuadru sira ne’e uza lian mistura de’it balun lian indonéziu, balun inglés, entaun dezafiu iha li’ur barak liu,” nia akresenta.
Nia dehan, UNTL sai referénsia no ezemplu ba lian portugés tanba universidade privadu barak no universidade públiku rua de’it IPB no UNTL, maibé universidade barak mós disemina lian portugés, hanesan Cristal no Universidade Católica de Timorense (UCT), hirak ne’e sira disemina iha kampus hahú ho lian portugés, balun mistura ho lian inglés no tetun.
“UNTL sai referénsia depende ba área saida mak imi hakarak haree tuir, haree lian ga, haree tuir formasaun siénsia ga, ita kuandu haree tuir kualidade ne’e ita haree se mak avalia kualidade ne’e ANAAA, avalia mai hatuur universidade nia letra A ka B, entaun iha haree tuir kualidade se mak di’ak liu ne’e,” nia katak.
Jornalista : Osória Marques
Editora : Julia Chatarina
