DILI, 23 setembru 2024 (TATOLI)–Diretór Ezekutivu Luta Hamutuk, Jose Alves da Costa, hateten Governu presiza prevee orsamentu atu bele kuidadu no garante manutensaun ba esplanada no altar Tasi-Tolu ne’ebé Governu gasta ona orsamentu ba konstrusaun infraestrutura iha fatin ne’ebá.
Notísia Relevante: Igreja husu ema hotu proteje esplanada Tasi-Tolu
Nia esplika, importante liu mak garante kualidade infraestrutura atu mantein obra ne’e ba longu prazu, tanba fatin ne’ebá nu’udar fatin istóriku ba iha atividade Estadu no igreja nian.
“Ita-nia kustume aat ida mak manutensaun. Agora Ita iha tiha gastu boot, maibé ita hakarak to’o aat ida la aproveita mak foin hadi’a ho gastu boot. Tenke prevee osan atu halo manutensaun periodika hodi nune’e bele asegura katak sasán infraestrutura ne’ebé ita hasai osan hodi konstrui ne’e, bele mantein ninia kualidade ne’ebé di’ak,” Diretór Ezekutivu Luta Hamutuk, Jose Alves da Costa, hateten ba Agência Tatoli, iha Bacora.
Nia husu, Governu tenke konsiensializa sidadaun sira hodi halo kontrolu, kria no iha regra ruma, liuliu Ministériu Turizmu no Ambiente no Autoridade Munisipál Dili (AMD) nia responsabilidade atu tau matan ba sítiu turístiku ida-ne’e.
“Ida-ne’e responsabilidade Ministériu Turizmu no Ambiente no Autoridade Munisipál Díli nia liman, hodi halo jestaun di’ak atu halo kontrolu no ema labele estraga osan boot. Eventu la’ós ida-ne’e de’it, aban bain rua sei iha eventu sira seluk ne’e, ita la presiza tan gasta osan boot,” nia dehan.
Nia hateten, Timor-Leste uza rekursu ne’ebé iha ona no uza rekursu ne’ebé gasta ona osan boot, tanba ne’e mak presiza kontrola hodi sai sítiu turizmu relijiozu ida-ne’ebé vizitante sira vizita, hodi fó rendimentu ruma ba Estadu.
Karik sei transforma ba sítiu turistiku relijiozu, diretór Ezekutivu ne’e hatán, ida-ne’e importante ba iha Estadu no Igreja hodi dezenvolve di’ak liután fatin ne’ebá, atu peregrinu sira no turista sira bele ba vizita fatin ne’e.
“Ha’u haree ida-ne’e importante, tanba amu Papa la’ós tinan-tinan mai vizita Timor-Leste. Mensajen Papa Francisco nian ne’ebé furak ne’e, ita bele hakerek iha plaka ida-idak tau iha ne’ebá atu ema bele ba lee, analiza no interpreta. Maibé, ida-ne’e kontrolu nafatin husi munisipiu Dili. Ida-ne’e Estadu nian no igreja mós hetan husi Estadu,” nia hateten.
Iha fatin hanesan, Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, rekomenda katak infraestrutura sira-ne’ebé konstrui husi osan Estadu nian ne’e Estadu tenke kuidadu.
“Ami-nia rekomendasaun forte tebes katak kualker konstrusaun ne’ebé halo ho osan Estadu nian ne’e aset. Ida-ne’e, responsabilidade Governu no Estadu nian. Saída mak halo iha ne’ebá gasta osan millaun ba millaun ne’e la’ós fonte kiik. Tenke tau duni atensaun sériu, kontinuasaun iha atensaun atu sasán ba ema barak nia nesesidade labele estraga,” nia dehan.
Notísia Relevante: Membru PN husu Governu transforma Tasi-Tolu sai sentru relijiozu turístiku
Jornalista : Jesuína Xavier
Editór : CancioXimenes
